ماہل بلوچ نا دزگیر ئٹ منوک بیان شینک، دا بابت کانود انت پائک ؟

الّمی خوانبو

دزگیر مروک بلوچ زالبول ماہل بلوچ نا بابت سر وزیر بلوچستان نا ترجمان، سی ٹی ڈی کوالخواک کوئٹہ ئٹ اونا دزگیر کننگ و دوبہ تابابت پریس کانفرنس کرینو اندن سی ٹی ڈی نا کنڈ آن ماہل بلوچ نا گمانی وڑ ئٹ اسہ منّوک ویڈیو بیان اس ہم شینک کننگانے۔ کانودیچاہندار آتا رد ئٹ دزگیر ئٹ ماہل بلوچ نا ویڈیو شینک کننگ تینٹ اسہ بیدس کانودی عمل ئسے۔

ماہل بلوچ ءِ تدوکا تُو کوئٹہ ئٹ ننکان اونا اُرا غان زوراکی ئٹ بیگواہ کننگا و اسہ دے ئسے آن گڈ سی ٹی ڈی اونا دزگیری ءِ پاش کرےاندن اوکان گڈ دا کیس ئٹ دائسکان عدالت آن سی ٹی ڈی نا کنڈ آن اِرا وار ہفت ہفت و اِرا وار دئے دئے دے ئنا ریمانڈ نا موکل ہلنگا۔

واہم سر وزیر بلوچستان نا ترجمان بابر یوسفزئی سی ٹی ڈی نا ڈی آئی جی تون اوار پریس کانفرنس کریسہ دعویٰ کرینے کہ ماہل بلوچنا کمک ئٹ بلوچستان ئٹ بھاز بھلو کاروائی اس مننگ ئس ہرادے سی ٹی ڈی بےسہب کرینے۔

پریس کانفرنس ئٹ اوفک دعویٰ کرینو کہ ماہل بلوچ منانے کہ او بلوچ سلہہ بند تنظیم نا باسک ئسے و ماہل نا اَرغ نا تعلقداری بی ایلایف آن ئس۔ ماہل نا اَرغ اودے پارے کہ نن آجوئی کن جنگ کینہ اندن شربت خان پنی ءُ بندغ اس ماہل ءِ خودکش جیکٹ اس تسوسس۔

ترجمان ماہل نا حوالہ ءِ تریسہ پارے کہ ماہل تینٹ منانےپاننگک کہ پولیس نا دزگیر ئٹ مروک آتیتون جنسی بے دادی کننگک دا کل ردءُ، کنے دزگیر ئٹ نہ خُلیفنگا نئے کہ کنتون گندہ رویہ تخنگا۔

ترجمان پارے کہ کالعدم تنظیم آک ورنا تا ذہن تے بدل کننگ ءُ، سی ٹی ڈی ءِ حوال رسینگاسس کہ منہ بندغ ورنا تے ریفنگ ءُ، ہودہ فروریآ ماہل بلوچ ءِ خودکش جیکٹ تون اوار دزگیر کننگا۔ ترجمان نا رد ئٹ یوسف پنی ءُ بندغ اس ماہل بلوچ ءِ ریفیسس، یوسف بلوچ ماہل وڈاکٹر اللہ نذر نا سیال ئسے، یوسف بلوچ ماہل بلوچ نا دُسخینچ نا اَرغ ءِ۔

پریس کانفرنس ئٹ دعویٰ کننگا کہ اول ماہل بلوچ ءِ بی بی گل نا کمک ئٹ زر رسینگاکہ و بی بی گل نا ایران آ ہننگ آن گڈ اونا دُسخینچپری گل غٹ کاریم تے اُننگ ئس۔ ماہل بلوچ ءِ اونا چنا تے کسفنگ نا تڑی تریسہ کالعدم تنظیم ئٹ اوار کننگا، ماہل بلوچ نا کمک ئٹبلوچستان ئٹ بھلو کاروائی اس مننگ ئس۔ ترجمان نا رد ئٹ ماہل بلوچ خودکش جیکٹ ءِ پین اسٹ ئسے تننگ کن اِننگ ئس۔

ڈی آئی جی سی ٹی ڈی اعتزاز گورایا پارے کہ اگہ نن زوراکی ئٹ بیان ہلین گڑا عدالت ئٹ گواچنیک مونا برور، کمکار تے دزگیر کننگو۔ماہل بلوچ آن رسینگوک شاہد آتا کمک ئٹ دہشت گرد آتا پد رند کننگو، سر و سوج آن گڈ عدالت آن ہم دا بندغ آتا دزگیری کن وارنٹہلون۔

خیال ئٹ مرے کہ بلوچستان لبریشن فرنٹ نا ترجمان میجر گہرام بلوچ دا بابت بیان ئٹ پارے کہ نہ ماہل بلوچ بی ایل ایف نا اسہسرمچار ئسے و نئے کہ جند ندر ئسے۔

ترجمان نا پاننگ ئس کہ سی ٹی ڈی نا کارندہ تیٹ داخس ہمت و جیرت ہرادے کہ او بی ایل ایف نا اسہ سرمچار ئسے دزگیر کیر۔ سیٹی ڈی نا مسخت فوج و ڈھکوک ایجنسی تا دو آن زوراکی ئٹ بیگواہ بلوچ ورنا تے دروغ نا مونتس تیٹ کسفنگ و دروغ مقدمہ نوشتہکریسہ دروغ کاروائی تیٹ اوفتا دزگیری پاش کننگ ءِ۔ کوزہ مروک بلوچستان نا دُتک آ حکومت نا وڑ سی ٹی ڈی ہم فوج و ڈھکوک ادارہتا اسہ بے دادی کمکار ئسے ہرا نا کمک ئٹ او تینا بیدس کانود کاروائی تے کانود نا لویس ءِ بیرفیسہ و تینا تالان کروک آ تیوہ گند ءِ اوفتامون آ خوشکرہ۔

دزگیر مروک آتا ویڈیو بیانک و کانود

دزگیر ئٹ اسہ بندغ ئسے نا ویڈیو نا بابت کانودی ہیت انت ءِ دا بابت ہراتم دی بلوچستان پوسٹ کانودی چاہندار آتون احوال کرے توپاننگا کہ کانود دا وڑ ئنا کاریم تا موکل تفک نئے کہ عدالت دا وڑ بے دادی نا زی آ ہلوک اعترافی بیان ءِ منیک و نئے کہ کانود دانا موکلایتک۔

ہراتم نن سوج کرین کہ ویڈیو ءِ الس نا مونا ہتنگ نا بابت کانودی ہیت انت ءِ، کانود دان آتا پاننگ ئس کہ کانود دا وڑ ئنا کاریم تا اسُلموکل تفک و دا وڑ ئنا کاریمک بیدس کانودی ءُ۔ دا وڑ ئنا کاریمک کیس ءِ زیمی و عدالتی نظام ءِ گمراہ کننگ کن کننگرہ، ہرا اسُل بےکانودی ءِ۔ اوفک پاریر کہ دا وڑ ئنا عمل ئٹ عدالت تینٹ سوموٹو نوٹس ہلے و دا عمل نا ذمہ وار آتیا کانودی کاروائی کے۔

یاتی مرے بلوچستان ئٹ کاؤنٹر ٹیررازم ڈیپارٹمنٹ (سی ٹی ڈی) نا کاروائی تیا ہنوک وخت ئٹ سوج ارفنگانے اندن دروغ نا مونتس تیٹبیگواہ بندغ تا خون کننگ نا بر خلاف بھلو کچ اسیٹ برانز ہم خننگ ئٹ بسونے۔

ماہل بلوچ نا زوراکی ئٹ بیگواہی و دزگیری آ بلوچستان نا جتاء علاقہ تیٹ دپدرشانی تون اوار تولوک برانز ہم کننگا اندن سیاسی وچاگڑدی کڑدہ غاک دا بابت پریس کانفرنس و بیان تا کمک ئٹ اونا دزگیری و دوبہ تے منیتنو۔

پُوسکنا حوالک

بلوچ راجی مچی نا بشخ مرِسہ جہان ءِ نشان ایتبو کہ نن زندہ و شرفدار ءُ راج ئسے اُن۔ ماہ رنگ بلوچ

بلوچ راج 28 جولائی نا دے گوادر ئٹ سرمریر و جہان ئے کلہو ایتر کہ نن زندہ و خوددار...