اوغانستان نا بنجائی شار کابل ئٹ ٹہیفوک وزارت خارجہ نا دفتر نا رکھوک بنجائی در آ جلہو کار خودکش تراک کرے۔
تدینی نا بابت طالبان حکومتی ترجمان تینا بیان ئٹ 6 بندغ نا کہنگ ءِ پک کریسہ پارے کہ خودکش جلہو کار ءِ چیک پوسٹ آ سلنگ نااشارہ کننگاسس۔
ترجمان اوغان کوالخواہ تا رد ئٹ خودکش بمبار سلتو گڑا سکیورٹی کارندہ غاک اوڑا سم کاری کریر ہراڑان او ٹپی مریسہ تما و ہموتمخودکش تراک کرے۔
خودکش جلہو ئٹ 10 آن زیات بندغ ٹپی ہم مسر ہرافتے خڑک ئنا اسپتال آ دننگا ہراڑے 3 ٹپی بندغ تا حالیت نازرک مننگ نا سوب کہوکآتا کچ ئٹ ودکی نا خُلیس پاش کننگک، کہوک آ کل بندغ آک شاری ءُ واہم ٹپی آتیٹ سکیورٹی کارندہ ہم اوار ءِ۔
کوالخواہ تا رد ئٹ جلہو کار نا پوسٹ مارٹم کننگک واہم دائسکان اونا چاہنداری متنے، و دائسکان ہچو ٹولی اس دا جلہو نا ذمہ واری ءِارفتنے۔
یاتی مرے کہ طالبان نا اقتدار ئٹ بننگ آن گڈ سکیورٹی کارندہ، سرکاری دفتر و امام بارگاہ تیا جلہو تیٹ داعش خراسان اوار مسونے۔
طالبان نا دعویٰ ءِ کہ او برجاء وخت ئٹ داعش خراسان نا برخلاف کاروائی ئٹ بھلو سرسہبی دوئی کرینو و داعش برصغیر نا سروک توناوار اہم کمانڈر تے فوجی آپریشن ئٹ کسفنگانے۔
جاچ ہلوک آتا پاننگ ءِ کہ اینو وزارت خارجہ غا مروک خودکش جلہو داعش نا برخلاف مروک کاروائی تا بدلہ مننگ کیک۔ یاتی مرے ششتُو ئٹ اوغانستان نا وزارت خارجہ نا دفتر آ مروک دا مسٹمیکو بھلا جلہو ءِ۔