بلوچستان نا ضلع سبی نا علاقہ ڈھاڈر ئٹ استو پاکستانی لشکر و سلہہ بند بندغ آتا نیام ئٹ جھڑپ مسوسس، اندن جھڑپ آن گڈ اینوارٹمیکو دے ہم علاقہ ٹی فوجی ہیلی کاپٹر آتا ہن و بر برجاء ءِ۔
ڈھاڈر نا علاقہ صبری ٹی استو شام نماز نا وخت سلہہ بند بندغ و پاکستانی لشکر نا نیام ئٹ جھڑپ مسوسس ہراڑے اُرے اسکان سمکاری برجاء مس۔
جھڑپ آن گڈ پاکستانی لشکر نا بھلو کچ اس علاقہ ٹی سر مس۔ فورسز آک استو آن آپریشن بناء کرینو اندن حوالکار آک ٹی بی پی ءِپاریر کہ اینو سہب آن پاکستانی لشکر نا ہیلی کاپٹر آتا ہن و بر ہم برجاء ءِ۔
حوالکار تا رد ئٹ پن کروک علاقہ ٹی بلوچ آجوئی دوست سلہہ بند گل آک ساڑی ءُ، اوفتا پاننگ ءِ کہ مننگ کیک کہ پاکستانی لشکر وبلوچ سرمچار تا نیام ئٹ جھڑپ مسونے۔
اندن پاکستانی لشکر نا شعبہ تعلقات عامہ (آئی ایس پی آر) سبی نا علاقہ ڈھاڈر ئٹ جھڑپ نا پک کرینے۔ آئی ایس پی آر نا رد ئٹڈھاڈر آپریشن ئٹ اسہ سلہہ بند بندغ اس کسفنگانے۔
آئی ایس پی آر بیان ئٹ دعویٰ کرینے کہ سبی نا جہاندمی علاقہ نوشمان ئٹ سُر پُر کروک بندغ تا اسہ ٹولی ئسے توننگ کن انٹیلیجنس آپریشن بناء کننگا۔
بیان ئٹ دعویٰ کننگا کہ پک کروک حوال تا بنداو آ استو سلہہ بند بندغ آتا دوٹی مروک علاقہ ئٹ جتا کسر تیا کیہی ہند آتیا جھپخلنگاسس۔ ہرافتا سوب مُسہ سلہہ بند بندغ تا اسہ ٹولی ئسے اوفتا جاگہ غا ہننگ آن توننگا۔ توننگ نا سوب اوفک فورسز آتیا سم کاریکریر۔
بیان ئٹ پاننگا کہ ہڑتوما پارہ غاتیان ترند سم کاری نا وخت اسہ بندغ اس کسفنگا اندن اِرٹ ٹپی مسر، سلہہ و گولہ بارود نا کوڑ ہماوفتیان خننگانے۔