پاکستانی فورسز کارندہ آک بلوچستان آن پین ارا بندغ ءِ زوراکی ئٹ بیگواہ کریر ۔
بلوچستان نا ضلع خضدار آن پاکستانی فورسز کارندہ آک ارا بندغ ءِ دزگیر کننگ آن گڈ نا درست ہند آ دریر ۔
ذرائع تا ردئٹ ٹی بی پی ءِ پاننگا کہ تدوکا نن نو بجہ نا وخت پاکستانی فورسز و ڈھکوک ادارہ نا کارندہ آک خضدار ٹی جعفرآباد ناہند آن ارا بندغ جاوید زہری ولد غلام نبی زہری ءِ ہمو وخت دزگیر کریر ہرا وخت او ہڑتوماک جاوید زہری نا دکان آ ساڑی ئسر ۔
علاقائی ذرائع تا پاننگ ءِ کہ جاوید زہری زمینداری و دکانداری کریسہ تینا معاش ءِ پٹینگ ئس اندن او زوراکی ئٹ بیگواہ کننگ آن گڈنوشکی ٹی سی ٹی ڈی نا دروغ مقابلہ ٹی کسفنگوک تابش زہری نا ہلہ مار ءِ۔
ضلعی کوالخواہ دائسکان دا بابت اسہ ہم ہیت ئس مونا ہتنے ۔
ٹی بی پی مارچ 2023 نا ایسری ارا ہفتہ ٹی بلوچستان نا جتاء علاقہ آتیان زوراکی ئٹ بیگواہی تا حساب و کچ ءِ مُچ کرینے۔ تیدری ٹیدا دا درشان مس کہ مارچ نا ایسری ارا ہفتہ ٹی 24 بندغ ءِ زوراکی ئٹ بیگواہ کننگا ، 5 ءِ آجو کننگا و 5 نا جون آک دوئی کننگار ۔
برجاء سال بلوچستان ٹی زوراکی ئٹ بیگواہی و برمتہ کروک بندغ آتا جون آتا دوئی کننگ نا تدینی ٹی گیشتر زیاتی خننگانے۔ جہانیبندغی حق آتا تنظیم آک بلوچستان ٹی دا تدینی تیٹ فریشانی نا اظہار کرینو ۔