ایران نا جیل ئٹ بندی بلوچستان نا مُسہ مچی ہلوک آتے پنچ سال ئنا قید و پنچ لکھ 88 ہزار پاکستانی روپئی ڈنڈ ئنا سزا بِنفنگانے۔ہرافتا چاہنداری ساحل نا مار جلال احمد، وشدل نا مار راشد علی و سرتاج نا پن تیٹ مسونے، پن کروک بندغ تا تعلقداری گوادر ناتحصیل پسنی آن ءِ۔
بلوچستان نا مچی ہلوک آتون اوار 8 پاکستانی مچی ہلوک محمد حسین نا مار سکندر علی، غلام مصطفیٰ نا مار مظفر، محمد حنیف نامار سلیمان، بورل نا مار غلام رسول، عمر بخش نا مار مہر بخش، گوریچ نا مار صمد و عبدالرزاق نا مار حسین ءِ ہم سزا تننگانے۔
پاننگک کہ ایران نا صوبہ ہرمزگان و ڈسٹرکٹ جاشک نا عدالت 2020 ئٹ مچی ہلوک آتے سزا تسوسس “آن لائن” ئٹ حوال تا پیریکننگ آن گڈ بندغی حق آتیکن کاریم کروک گل آک میناب نا جیل آ ہنیسہ بلوچستان و پاکستان نا بندی مچی ہلوک آتون اوڑدہی کریرہراڑے مچی ہلوک آک پاریر کہ اوفتے عدالت پنچ سال ئنا سزا تسونے۔
مچی ہلوک آک تینا سزا نا مُسہ سال گدریفینو۔
مچی ہلوک آتا ڈکھی آ خاہوت آک پاکستانی کوالخواہ تیان خواست کرینو کہ او دا بابت ایرانی سفیر تون اوڑدہی کریسہ مچی ہلوک آتاسزا ٹی کمبتی و ڈنڈ ءِ ایسر کننگ نا خواست کیر۔