اسہ ہنینو تغ اس
نوشت: نوشاد بلوچ
مٹ: زِرماہ بلوچ
دی بلوچستان پوسٹ
چار سال آن پد ہراتم اود کنے خنا تو کنا کنڈ آ رمب کریسہ بننگ ئس ای ہم تینا نت تے توننگ کتوٹ و اونا کنڈ آ تینا گام تے ارفیسہ کریٹہمر کہ کنے سر مس و کنے خمب کریسہ ہوغنگ ءِ بناء کرے؛ ارانگ ہناسس نی، اراڑے اراڑے نے پٹتنوٹ ای، ای ہر کسری ملنگ و فقیر آننے سوج کرینٹ، ای تو مسیت، مندر، مزار آتے اسکان ہنانٹ نے پٹنگ کن، پدا کنا کوپہ غا کاٹم ءِ تخا و پارے بھلو بے وفا ئسے اُس نی،ارانگ ہناسس او امرو جاگہ اس ئس ہراڑے ای نا است آ بتوٹ۔ پدا معصوم آ چنا تیانبار تینا مون ءِ پینگر کرے و پارے کہ ای نے تون ہیتکپروٹ مُر مر کنے آن، اینو آن پد ای نے آن غصہ اٹ۔
ای اودے پاننگ ئسوٹ کہ اوڑان مست ہنینا تغ ایسر مس و کنا خنک ملنگار۔ ہرا چادر ئٹ ای تینا جون ءِ ڈھکاسٹ داسہ او بیرہ کنا موناسکان ئس و کنا نَک یخ مننگ ئسر۔ کنا توفک نا بیرل دائسکان اسہ محبوبہ ئسے نا وڑ ئٹ کنا کلک آتیا لچوک ئس۔ ہرا خل ئنا زی آ ای تینا کاٹم ءِ تخاسٹ بھاز بڑز مننگ نا سوب آن داسہ کنا لخ ئٹ ہم دڑد مننگ ئس و ملاسی نا سوب آن کنا گٹ ہم خشک مسوسس۔
راستیکو پارہ غا ٹنگوک دیری آ بوتل ءِ ہراتم ای سرفیٹ او ہم خشک مسوسس بلکن دوانزدہ بجہ نا خڑک ہرا سنگت کنتون اوار تولوک ئساود کنے تا۔ او وخت سہب نا چار بجہ مننگ ئس ای بش مسوٹ تینا توفک ءِ کوپہ ٹی شاغاٹ تینا چوٹ آتا بند آتے تفنگ بنا کریٹ اوکانپد ہڑدے آنبار تینا المی آ گڑاتے و تینا ہورک آ بوتل ءِ دوٹی ارفیٹ رادہ مسوٹ دیخہ مُر اسہ دیر ئنا چشمہ اس ئس ہراکان ای تینا بوتل ءِدیر آن پر کننگ کریٹہ، ای اوکان دیر پُر کننگ آن گڈ مُستی تینا سفر کن رادہ مسوٹ ہراڑے کنے اسہ سنگت ئسے اسکان سر مروئی ئسہرا اوڑے تیوی نن تولوک گھاٹ تننگ ئس۔
داسا ای ہمو تغ ئنا بابت سوچنگ بنا کریٹ، ای اندا سوچنگ ئسوٹ کہ داسہ ای دا وڑ ئنا تغ انتئے خنیوہ
مگہ ای نزور مننگ اٹ
مگہ ای دم درینگانٹ
مگہ ای گیشتر ہننگ کپرہ
مگہ دائسکان ہم کسس کنا ودار ئٹ کسر تے ہننگ ءِ
مگہ کنے اونا خڑک آ ہنوئی ءِ
مگہ اود دائسکان کنکن ہننگ ءِ
وڑ وڑ ئنا سوج آک داسہ کنا ذہن ئٹ بننگ ئسر۔
پدا ای اونا بابت سوچ خلنگ ءِ بنا کریٹ اُست ئٹ ای اونا بارو ئٹ ہیت کریسہ کریٹ کہ ای تو اودے چار سال مالو ہر ہیت ءِ پاریٹ پیشتماٹ مچا ءُ اسہ نن اس نن اوار توسن و ای اودے پہہ کریسہ کریٹ و اود منا ہم کہ داسہ نن ہڑتوما تا کسر یکہ ءِ، ای داسہ ہمو شارآتیان ساندہی کن بھاز مر پیش تمنگ اُٹ ہرافتیان منہ دے ئکن پیش تمنگ ہم کنے وڑتوکہ۔
ایہن تو اینو ہم کنا است ئٹ اوڑکن ہموخس مہر و مابت ارے ہخس کہ اولی وار نا خننگ آن ئس۔ اینو ہم ہراڑے ای یکہ تولیوہ تو اوڑتونگدریفوک آ ہر ساہت کنا است آ بریک۔ اینو ہم کنے اونا بشخندہ تون ہموخس مہر ارے ہخس کہ مالو ئس۔ اود تو کنے پاریکہ ای ہر وختنا ودار ءِ کروٹ ای نے آ اسل اسہ وڑ ئسے نا ہم زور شاغپروٹ ہرا نا سوب آن نی تینا مسخت آن پدی مریس۔ ای تو ہر وخت نا بانورمروک تولوک مروٹ۔ بس نی کنتون اسہ وعدہ اس کر کہ ہرا مسخت کہ نی کنے النگ ہننگ اس ہمو مسخت ءِ تیوی وڑ ئٹ دوئی کریسہپدا بروس۔ ہراتم دا ڈغار آزات مرو زوراک آ ریاست آن، ہراتم کل جانباز سپاہیک دا زیبا غا مَش تا زیب مریسہ شیف دڑنگیسہ کرور توای تینٹ نے بخیر کننگ کن سلوک مروٹ۔
اگہ نی دا جہد ئٹ اسہ جاگہ ئسے آ شہید مریسہ تو ای تینا کاٹم ءِ فخر ئٹ بڑز کروٹ۔ ہراتم نا دتری جون دا خلق ئٹ سر مرو تو ای نےاسہ برامی ئسے آنبار جوڑ کروٹ و رخصت کروٹ۔ یات تخس ای نے اسل بشخپروٹ امو وخت ہراتم نی اسہ لغور ئسے نا وڑ تینا سلہہ ءِدژمن نا مونا بٹیسہ شرمندہ مروک کاٹم ءِ شیف کریسہ پدا بروس۔ گڑا او وخت نی کنکن بیرہ اسہ باریم اس مروس و پین ہچ اس آخہ۔
داسہ سہب ئنا روشنائی اسل پاش مسوسس دے ئنا تپش تینا باسنی ءِ مدان مدان النگ ئس۔ ای ہم دم درینگاسٹ بس کوشست ئس زوتینا مزل ءِ سر مریو و تینکن چاہ ئنا بست و بند ءِ کیو پدا ای تینا گام تے ترندی ئٹ ارفیسہ کریٹ۔ داسہ ای تینا مزل ءِ سر مننگ ئسوٹہمر کہ ای خڑک سر مسوٹ تو ہمو سنگت توار کرے و پارے کہ سنگت نی دیر ئنا بوتل ءِ تینتون ہتنگ اُس یا نہ، ای اینو دیر مچٹہیسوسٹ او زو ایسر مسر و تیوی نن ای ملاس مسونٹ۔
ای دیخہ مر ئسوٹ تو ہئو کننگ نا جاگہ غا تینا کاٹم ءِ ہئو ئنا ورندی ٹی سرفیٹ و او سنگت نا پارہ غا تینا گام تے ارفیسہ کریٹ۔
ای اوڑے سر مسوٹ و تینا توفک ءِ خل ئسے آ ٹیک تسوٹ و تینا چنتہ ءِ کوپہ غاتیان کشنگ ئسوٹ ہمو وخت سنگت پارے کہ سنگت تیناچادر ءِ توفک نا زی آ شاغ دے ئنا شروخ تا سوب توفک نا نل گروشک ایتک۔ ہرا ہمرو جاگہ ئسے آن مرے ہم چاننگک۔
ای بشخندہ کریسہ تینا چادر ءِ توفک نا زی آ شاغاٹ و پاریٹ یار اینو ای بھاز دم درینگانٹ سما اف اینو دا کسر مرغن مسونے یا کنےٹی چرینگ نا تاغت سلتنے۔
سنگت ٹاکو اس خلیسہ پارے کہ امرو ہیت کیسہ یار، ہڑدے اندا کسر ئٹ بریسہ اینو امر مرغن مس، نہ دا کسر مرغن مسونے نئے کہ کناسنگت چرینگ نا تاغت ءِ گوہانے۔ اینو ہم نی دا بڑز انگا مش تیٹ اندن چرینگسہ دنکہ گڈ، دنکہ مشی آ ہیٹ دا تلار تیٹ درک خلیسہگوازی کیک۔ داسہ نی دم درینگ نا ہیت ءِ کرینس تو سلہ ای نیکن چاہ اس کیوہ۔
ای ورندی تریسہ پاریٹ یار نی تو کنا است ئنا ہیت ءِ کریس منتوار مروٹ نا۔
نہ یار داٹی منتوار پاننگ نا ہچو ہیت اس اف، بس ہیت دادے کہ کنا چاہ ءِ کننگ آن پد سفت ءِ کپیس کنا، کنے سما ءِ نا سفت کبین تموکنے آ۔
ای: ہاہاہا۔۔۔۔۔۔۔خلپہ ای نے ہڑدے چاہ کننگ کہ پاپروٹ۔
نہ سنگت ای تو مسخرہ کننگ ئسوٹ بھلا اسہ سنگت ئسے کن چاہ ئنا کننگ ارا سخت انگا کاریم ءِ۔ جُوان، خڑک آ تخوک بغل جولا ئٹپلاسٹک نا تہٹی ارغ اس تخوک ءِ اودے ہم کنے ایت باسفیوہ تہ، چاہ کننگ آن پد ای سنگت ءِ پاریٹ یار نی تو بھاز جوانو چاہ کیسہ نےتو ہوٹل اس ملوئی ئس۔
سنگت مسخرہ ئٹ پارے ای ہم اندا سوچنگ ئسوٹ ولے امر کین دا ریاست ننا راج و ڈغار آ بھاز ظلم کننگ ءِ دا کل ئنا حساب ءِ ہم توہلوئی ءِ۔ دا ڈغار نا رکھ ئکن اخس سنگت قربانی تسونو، اخس لمہ آتا چناک شہید مسونو، اخس سنگت آتا سنگتی آن مر مسونن۔ ننتونزند ئنا داسہ اسہ مسخت اس رہینگانے یا تو تینا ڈغار ءِ آزات کرفون یا گڑا اسہ اندنو تاریخ اس رقم کریسہ دم الون ہراڑان ننا بروکانسل آک ہم دا مزاحمت نا کسر ءِ تینا فرض سرپد مریر داسہ تو سنگت آتا شہادت ہم ننے اخس سوگو کرینے دانا اندازہ ءِ دژمن جوانخلنگ کیک کہ ننا جنگ ارا ترندی ئٹ مونی ہننگ ءِ۔ مالو نن ٹارگٹ کلنگ یا دژمن نا کسر ءِ بند کننگ ئٹ اوفتے ٹک کرینہ داسہ پاش دژمننا کیمپ آتیٹی پیہسہ آزاد بلوچستان نا نعرہ ءِ بڑز کننگ اُن، دژمن نا سنگر آتے ہشیسہ بھس کننگ اُن و اوفتا کل گڑا تے کوزہ کننگ وسنگر آتے تا خاخر تننگ اُن۔
مالو نن دژمن نا چوکی و اوفتا جاگہ آتا چغلی بمب خسانہ داسہ نن پاش اوفتا جند ندر جلہو کننگ اُن، 70 گھنٹہ ننا سنگتاک اوفتاکیمپ آتیا کوزہ ءِ برجاء تخیسہ تینا گڈیکو سم ئنا ودار ءِ کیرہ و دژمن ءِ انداخس بیوس کیرہ کہ او تینٹ تینا کیمپ آتے بمباری و جہازآتیٹ شیلنگ کریسہ بھس کننگ آ بیوس مریک، ایہن ہم دا ریاست ننے اسہ جاگہ ئسے آ تولنگ ارا الیک۔ ہئو یار نی جوان پاننگ اس ولےنن ہم تو اودے ہچ الینگ افن بس انشاءاللہ اسہ دے اس نن تینا ڈغار ءِ آزات کرفون و گڑا نی تینا ہوٹل اس ملیس و ای تینا خلق آ ہنوٹہرانا گلی تیٹی سما اف ارا ارا ارمان ارا ارا اُست خواہی تے کڈ کرینٹ بسونٹ ولے نا دو ئنا چاہ ءِ کننگ کن الم بریسہ کروٹ۔
سںگت؛ہاہاہا۔۔۔۔۔۔۔۔ ای ہم ہر وخت نا چاری مروٹ۔
پدا او سنگت رخصت کریسہ دوارہ کیمپ ئنا کنڈ آ ہنا و ای اونا جاگہ غا توسٹ تینا زمہ واری ءِ سر تننگ نا بنا ءِ کریٹ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔