بلوچستان نا ضلع قلات ئٹ سلہہ بند بندغ آک پاکستانی لشکر آ جلہو کرینو۔
حوال تا رد ئٹ قلات نا علاقہ ہربوئی ٹی نادرست سلہہ بند بندغ آک درو پاکستانی لشکر آ جلہو کریر۔ بنائی حوال تا رد ئٹ فورسزکارندہ غاک مرگ ئنا گواچی و ٹپی مسونو۔
پن کروک جلہو نا ذمہ واری ءِ بلوچ آجوئی دوست سلہہ بند گل بلوچ لبریشن آرمی ارفینے۔
بلوچ لبریشن آرمی نا ترجمان جیئند بلوچ میڈیا ٹی شینک کروک بیان اسیٹ پارے کہ بی ایل اے نا سرمچار آک اینو سہب ئنا قلات ناعلاقہ ہربوئی، اسکلکو ئٹ بنجاہی کسر آن خڑک کوزہ گیر پاکستانی لشکر نا اِرا کارندہ ءِ ہموتم سلہہ بند جلہو ئٹ ٹک کریر ہراتم او پندآ تینا پوسٹ ئنا پارہ غا ہننگ ئسر، جلہو ئٹ اسہ دژمن کارندہ اس جاگہ غا مرگ ئنا گواچی اندن ایلو بھاز ٹپی مس۔
او پارے کہ انداڑتون سرمچار آتا ایلو ٹولی پن کروک پوسٹ آ گرنیڈ لانچر ئٹ کیہی گولہ تے خلک ہرافتا سوب دژمن ءِ گیشتر جانی و مالینسخان تتون مون تروئی تما۔
جیئند بلوچ پارے کہ بلوچ لبریشن آرمی دا جلہو نا ذمہ واری ءِ ارفک۔ کوزہ گیر لشکر نا تیوہ پیش تمنگ اسکان ننا کاروائیک برجاء مرور۔
داکان مُست جیئند بلوچ بیان اس شینک کریسہ پارے کہ بولان ئٹ کوزہ گیر لشکر تون جھڑپ ئٹ بلوچ لبریشن آرمی نا اِرا سرمچارشہید مسر اندن جھڑپ ئٹ کم آن کم ہشت دژمن کارندہ مرگ ئنا گواچی و کیہیک ٹپی مسر۔
او پارے کہ پانزدہ دے اسکان برجاء مروک جھڑپ آتا بناء 7 اپریل 2023 آ بولان نا علاقہ سارو و مچھ ئتون گنڈوک علاقہ تیان مس،جھڑپ آتیٹ کم آن کم ہشت کارندہ مرگ ئنا گواچی و کیہیک ٹپی مسر سرمچار آتا دو آن شکست کنوک دژمن بےسہبی آن گڈ مالو آندزگیر کروک مُسہ بلوچ ءِ شہید کریسہ اوفتا جوْن تے پن کروک علاقہ تیٹ خسا اندن دا نیام ئٹ مچھ آن اسہ خاہوت ئسے پنچ دےاسکان دزگیر کننگا و سارو نا ایب کیب ئٹ کیہی اُرا تے بھن تننگا۔
ترجمان پارے کہ جنگ ئنا ارٹمیکو دے جھڑپ ئٹ بی ایل اے نا اِرا سرمچار سنگت غنی خان مری بلوچ عرف حسن روکی و ولید عرفکمانڈو بہار شہادت نا بھلا ہند ءِ دوئی کریر، شہید مروک آ سنگت روزی خان مری نا مار غنی خان مری بلوچ عرف حسن روکی ناتعلقداری بولان نا علاقہ یخو آن ئس او تدوکا اسہ سال ئسے آن بلوچ لبریشن آرمی تون تفوک ئس۔
جیئند بلوچ پارے کہ شہید مروک آ ایلو سنگت محمد اقبال بلوچ نا مار ولید عرف کمانڈو بہار نا تعلقداری تربت نا علاقہ آبسر آن ئس اوراجی آجوئی نا جہد ئٹ تینا فرض ءِ سر تننگ کن اسہ سال اس مالو بلوچ لبریشن آرمی ٹی بسوسس۔