کاؤنٹر ٹیررازم ڈپارٹمنٹ واشک و کوئٹہ ئٹ اِرا جتا کارروائی تیٹی مونتس ئٹ 8 بندغ ءِ کسفنگ نا دعویٰ کرینے۔
کاؤنٹر ٹیررازم ڈپارٹمنٹ تینا بیان اسیٹ دعویٰ کرینے کہ بلوچستان ئٹ اِرا ڈھکوک حوال تا ردئٹ آپریشن آتیٹ 8 دہشت گرد ءِ کسفین۔
ترجمان سی ٹی ڈی بلوچستان نا ردئٹ اولیکو آپریشن ضلع واشک نا علاقہ بسیمہ ئٹ ترند سم کاری آن گڈ 5 بندغ ءِ کسفنگا اندن پن کروک بندغ تا نرّوک مُسہ سنگت نا دزگیری کن سرچ آپریشن برجاء ءِ۔
ترجمان دعویٰ کرینے کہ کوئٹہ ئٹ مروک ارٹمیکو آپریشن ئٹ ترند سم کاری آن گڈ کالعدم گل داعش نا مُسہ باسک ءِ کسفنگا اندن دہشت گرد آتا جاگہ غان اسہ تُوہ اس مالو برمتہ مروک بندغ ابوبکر ءِ ہم رکھوک یلہ کننگا۔ کسفنگوک بندغ تا جاگہ غان بھلا کچ ئٹ سلہہ و گولہ بارود خنیسہ پٹ و پول بنا کننگا۔
واشک ئٹ کسفنگوک بندغ آتیان چار ئنا چاہنداری محمد یاسین، فہد علی، جمال دین و عبداللہ نا پن تیٹ مسنے اندن اسٹ ئسے نا چاہنداری مننگ کتنے۔
احوالکار تا ردئٹ پن کروک بندغ آک گمانی وڑئٹ مالو آن دزگیر مروک بندغ ءُ ہرافتے سی ٹی ڈی دروغ نا مونتس ئٹ کسفینے۔ واہم دا حوال دائسکان پک متنے۔
سی ٹی ڈی و دروغ نا مونتس آک:
بلوچستان ئٹ سی ٹی ڈی نا کاروائی تے شکبر پن تننگک اندن کیہی کاروائیک میڈیا و زیمی مروک خاہوت نا وسیلہ ئٹ دروغ پن کننگانو واہم حکومتی وزیرک و کوالخواک دا کارروائی تا دفاع ءِ کیرہ۔
برجاء منہ وخت آن بلوچ راج دوست کڑدہ و بندغی حق آتا گل آک سی ٹی ڈی آ دوبہ خلیرہ کہ ہنوک وخت ئٹ ہرا کاریم تے بلوچستان ئٹ پاکستانی ڈھکوک ادارہ و فوج کریکہ ہمو کاریم تے اینو سی ٹی ڈی کننگ ءِ۔ دانا درشانی ءِ بلوچستان نیشنل پارٹی نا سروک و اسمبلی نا باسک سردار اختر مینگل کرینے۔
اِرا دے مالو خضدار نا علاقہ زہری نا ہندی غلام فاروق نا جون کوئٹہ نا علاقہ کلی قمبرانی ٹی کسر نا کرّک آن خننگاسس ہرادے خدو 27 اکتوبر آ مستونگ بنجاہی کسر آن پاکستانی لشکر و سادہ پُچ بینوک کارندہ غاک دزگیر کریسہ نادرست ہند آ دریسر۔
خدو جولائی ٹی پاکستانی لشکر زیارت آن خڑک اسہ مونتس اسیٹ بلوچ لبریشن آرمی تون تعلقداری تخوک 9 بندغ ءِ کسفنگ نا دعویٰ کریسس واہم پدان اوفتا چاہنداری مالو آن دزگیر مروک بیگواہ بندغ تا پن ئٹ مسوسس۔
زیارت تدینی نا برخلاف بلوچ بیگواہ بندغ تا خاہوت آک پنجاہ دے اسکان گورنر ہاؤس نا مونا تولوک برانز کریسر پدان بنجاہی وزیر رانا ثناء اللہ نا باوری ترفنگ آ کوئٹہ ریڈ زون ئٹ برانز ایسر کننگا ہراڑے برانزی تے کمیٹی باوری ترفے کہ زوراکی نا بیگواہی تا توننگ کن گامگیج کننگو و دروغ نا مونتس تیٹ دزگیر مروک بیگواہ بندغ تا خون کننگپرو۔
برجاء تدینی تیان گڈ بیگواہ بندغ تا خلیس تیٹ ودکی مسنے اندن بندغی حق آتا گل آتیتون اوار سیاسی ٹولیک حکومت آ نغدکاری کننگ ءُ۔