28 اگست آ بلوچستان نا بنجاہی شار کوئٹہ نا اسہ ہوٹل ئسے آن سی سالی آ نور خاتون ءِ اونا ارا چنکو چنا؛ مسڑ بانڑی و مار عبدالغفار تون اوار پاکستانی فورسز و ڈھکوک ادارہ تا کارندہ غاک دزگیری آن گڈ زوراکی ئٹ بے گواہ کریر۔
نور خاتون بلوچستان نا ضلع سبی نا علاقہ بدرا نا ہندی ئسے و دارو درمان نا ردئٹ شال آ بسوسس ہراکان اودے دزگیری آن گڈ بے گواہ کننگانے۔
پن کروک زالبول نا خاہوت بلوچستان نا سیاسی حالیت نا پد ندارہ ئٹ سال 1992 اسکان جلا وطن مسونے ہراڑان گڈ اونا خاہوت ایلو باہوٹی تیتون اوار پدا وطن آ بسر گڑا بلوچ راہشون خیر بخش مری نا نظریہ تون ہمگرنچی نا سوب آن اونا خاہوت ءِ ریاستی ادارہ غاک ٹک کریر، اُرا تیا چھاپہ خلنگا و خاہوت نا کیہی بندغ آک زوراکی ئٹ بے گواہ و کسفنگار۔
2008 ئٹ اندا خاہوت نا بندغ ئس مزار خان ولد گھرام ءِ زوراکی ئٹ بے گواہ کننگا ہرا دائسکان بے گواہ ءِ و وی بی ایم پی نا زوراکی ئٹ بے گواہی نا لڑ ئٹ اوار ءِ۔
عارف ولد سعیدان، یوسف ولد بنگل ہم ہندا خاہوت تون تفوک ئسر ہرافتے زوراکی ئٹ بے گواہی نا اسہ توہ ئسے آن پد دروغ نا مونتس ئٹ کسفسہ اوفتا جون تے خسنگا۔ نور عالم ولد دلشاد 2016 آن زوراکی ئٹ بے گواہ ءِ و عرض محمد ولد پیر محمد ءِ اوغانستان ئٹ ٹک کریسہ کسفنگا ہرا اوڑے باہوٹی نا زند تدیفنگ ئس۔
سیاسی و چاگڑدی کڑدہ غاتا پاننگ ءِ کہ دا خاہوت آ ریاستی ظلم آتیان پاش ءِ کہ ریاست نور خاتون و اونا چنا تے اشتماعی سزا تننگے۔
بلوچ زالبول تا زوراکی ئٹ بے گواہی و دزگیریک:
بلوچستان ئٹ دا اولیکو تدینی اف کہ ہراڑے زالبول و چنا تا زوراکی ئٹ بے گواہی نا تدینیک رپورٹ مسونو، برجاء سال بلوچستان ئٹ زوراکی نا بے گواہی تا دا مسٹمیکو تدینی ءِ ہراڑے زالبول و چنا تے پاکستانی فورسز آتا پارہ غان زوراکی ئٹ دزگیر کریسہ بے گواہ کننگانے۔
برجاء سال مسہ فروری نا نن بلوچستان نا بنجاہی شار کوئٹہ غان پاکستانی فورسز آک ننکان سریاب نا علاقہ گیشکوری ٹاؤن ئٹ اسہ ارا ئسے آ چھاپہ خلیسہ زالبول و چنا تتون اوار پنچ بندغ ءِ زوراکی ئٹ بے گواہ کریر۔
زوراکی ئٹ بے گواہ مروک آتتون اسہ پیر ءُ زالبول، ارا چنکو چنا، رحیم زہری و اونا زائیفہ رشیدہ اوار ئسر۔
داڑان بیدس برجاء سال پاکستانی پولیس نا کاؤنٹر ٹیررازم ڈیپارٹمنٹ (سی ٹی ڈی) کوئٹہ نا علاقہ سیٹلائٹ ٹاؤن آن اسہ بلوچ زالبول ماہل بلوچ ءِ اونا ارا غان دزگیر کریسہ اسیکہ نا درست ءُ ہند ئسے آ سر کرے واہم ولدا ترند السی ردعمل آن گڈ فورسز اوڑا ترند دوبہ خلیسہ اودے مون آ ایس۔
داکان مست خدو نومبر ئٹ بولان نا ایب کیب نا علاقہ تیٹ پاکستانی لشکر بھلو کچ اسیٹ فوجی آپریشن نا بناء ءِ کرے ہرا ارا ہفتہ اسکان برجاء مس۔ آپریشن نا وخت آ پاکستانی فورسز آک اوچ کمان نا ہند آ ہندی زالبول و چنا تے دزگیر کریر ہرافتیٹی زرگل مری،حنیفہ مری، در خاتون مری، ماہیسو سمالانی، گل بی بی سمالانی، سمو سمالانی، زر بخت سمالانی، بانج سمالانی، راجی سمالانی و چار سال آن بے گواہ رکھیہ سمالانی نا زائیفہ مہنا سمالانی و مار کلیم سمالانی اوار ئسر۔
بولان آپریشن ئٹ دزگیر مروک زالبول تے پدان سانگان نا ہند آ فورسز آک یلہ کریر۔
ساڑی آ زالبول و چناء تا زوراکی ئٹ بے گواہی نا تدینی نا بلوچ راج دوست و بندغی حق آتا ادارہ غاک مذمت ءِ کرینو اندن تربت سول سوسائٹی و وائس فار مسنگ پرسنز نا پارہ غان برانز نا پڑو کننگا و چاگڑدی احوالکاری تلہ تیا جتاء کڑدہ غاک دا عمل نا مذمت ءِ کننگ ءُ۔