پاکستان نا بنجاہی شار اسلام آباد ئٹ بلوچ زنک ایسری نا برخلاف بلوچ یکجہتی کمیٹی نا تولوک برانز اینو 59 میکو دے ہم برجاء مس، ہرانا ہمکوپئی و خاہوت آتیتون اواری نا درشانی کننگ کن بلوچستان ئٹ برانز آتا لڑ برجاء ءِ۔
اینو بلوچ یکجہتی کمیٹی نا پاننگ آ دشت بلنگور ئٹ کیہی زالبول و چنا تیتون اوار بھلو اسیٹ مخلوق برانز کریسہ اسلام آباد تولوک برانز تون اواری نا درشانی کریر و زوراکی نا بیگواہی و بلوچ زنک ایسری نا برخلاف سوختئی نا درشانی کریر۔
برانز ئٹ اوار مروک آک اسلام آباد تولوک برانز نا حق ئٹی نعرہ خلکر، بیگواہ بندغ تا یلہ کننگ نا خواست کریر، و زوراکی نا بیگواہی تے ساندہی کن ایسر کننگ نا خواست ہم کننگا۔
اندا وخت ئٹ بلیدہ ٹی ہم اسلام آباد تولوک برانز تون اواری نا درشانی کن برانز مس ہرا ٹی زالبول تیتون اوار کیہی بندغ آک اوار مسر۔
برانز محمد آباد پرائمری اسکول آن بناء کننگا ہرا شہید ایوب بلیدی چوک ءِ سر مس، اندن اینو بلیدہ ٹی شٹرڈاؤن ہڑتال ہم مس۔
برانزیک بلوچستان ئٹ زوراکی نا بیگواہی تا توننگ نا خواست کریسہ بیگواہ بندغ تا یلہ کننگ نا خواست کریر۔
اوفک اسلام آباد تولوک برانز نا برخلاف پروپیگنڈہ تا مذمت کریسہ پاریر کہ تیوہ غا بلوچستان تینا لُمہ غاتیتون سلوک ءِ۔ حکومتی بیانیہ دروغ آ تالان ءِ۔
برانزیک پاریر کہ پرامن برانزی جنز نا برخلاف جتاؤ چم کننگک ولے جیرت تخوک بلوچ زالبول تا سگ ئنا مونا ریاستی بیانیہ جہان نا مونا پاش مریسہ ءِ۔