بلوچستان ئٹ اِرا دہائی آن آجوئی نا جنگ برجاء ءِ و آجوئی نا جنز ءِ ایسر کننگ کن ریاست کیہی انسداد انسرجنسی پالیسی جوڑ کرے، ہرافتیٹ بلوچ سیاسی باسک آتے ہزار آتا کچ ئٹ زوراکی نا بیگواہی تا گواچی کننگا، زوراکی ئٹ بیگواہ غا کیہی بندغ تا کسر نا کرّک و گیاوان تیٹ جشوک جونک خسنگار و پولیس نا دروغ نا مونتس تیٹ بیگواہ بندغ تے کسفنگ نا چرجوئی دائسکان برجاء ءِ۔
ریاستی تادی تیان بلوچستان ئٹ اسہ بندغی گڑتی اس ودی مس و بلوچ راج بھیم ئنا گھیڑ ءِ پرغیسہ ریاست نا گمانی تادی تا برخلاف بلوچستان نا کنڈ کنڈ ئٹ ہزار آتا کچ ئٹ برانز کرے، و بلوچ یکجہتی کمیٹی نا تلہ آ بلوچ راج سیاسی مزاحمت کن سوگوْ مننگ ءِ۔
بلوچ سیاسی مزاحمت نا ترند آ توار عالمی جہان ئٹ ہم بِننگانے۔ اقوام متحدہ تون تفوک ادارہ غاک بلوچستان ئٹ بندغی حق آتا لتاڑنگ نا زی آ پٹ و پول کننگ ءُ و امریکہ و برطانیہ نا ہارلیمان ئٹ ہم بلوچ راج آ مروک تادی تیا شرہ مننگ ءِ۔
برجاء غا سیاسی ترندی آن مالو پاکستانی نا حکومتی طاغت آک بلوچ راجی ویل ءِ منہ سردار و پیشن ملکی طاغت آتا کاریم گوندارہ ولے داسہ پاکستان نا نگران سروزیر منّیک کہ بلوچستان ئٹ آجوئی و پجار نا جہد برجاء ءِ۔ انوار الحق کاکڑ نا دا گواچنی نا درشانی کننگ پاش کیک کہ ظلم و تادی ئٹ حق آتا و آجوئی نا جنز ءِ ایسر کننگ مننگ کپک و بلوچ راج ءِ راجی حق آتیتون اوار آجوئی نا حق تننگ ئٹ بلوچستان نا ویل ایسر مننگ کیک۔