گوادر ئٹ بلوچ یکجہتی کمیٹی نا سروکی ٹی تولوک برانز یانزدہمیکو دے ہم برجاء، ارٹمیکو پارہ غا بی وائی سی نا سروکی ٹی کوئٹہ، نوشکے، پنجگور و تربت ئٹ ہم تولوک برانز و ریلی تا لڑ برجاء ءِ۔
بلوچستان نا دریابی شار گوادر ئٹ بلوچ یکجہتی کمیٹی نا بلوچ راجی مُچی تولوک برانز تدوک یانزدہ دے آن برجاء ءِ۔ انٹرنیٹ و موبائل سروس آتیتون اوار شار ئٹ دیر ئنا سپلائی ہم بند ءِ۔ شار ئنا تہہ و پیشن نا کسر تا بند مننگ آن خوراک و ایلو گِڑا تا نیستی ودی مسنے۔
بی وائی سی تولوک برانز نا درو نا حوال ءِ چاگڑدی حوالکاری تلہ غا شینک کریسہ پارے کہ بلوچ راجی مُچی آ ظلم ئنا برخلاف بنجاہی تولوک برانز دا وخت گوادر ئٹ برجاء ءِ۔ گوادر تولوک برانز ئٹ درو السی دیوان اڈ تننگا ہراٹی بلوچ یکجہتی کمیٹی نا قیادت و مخلوق نا نیام ئٹ ساڑی آ حالیت آتیتون اوار جتا سرحال آتیا ہیت و گپ مس۔ بلوچ راجی مُچی ٹی اوار مروک آک غٹ ریاستی ظلم و تادی تیان پد ہم حوصلہ مند ءُ۔
بی وائی سی نا ردئٹ تدوکا دئے دے آن گوادر تون اوار تیوہ مکران ئٹ قیامت ءِ، دائسکان گوادر تون اوار مکران نا بھاز آ علاقہ تیٹ انٹرنیٹ و نیٹ ورک آک بند ءُ، مکران نا بھاز آ علاقہ تا کسرک ہم دائسکان بند ءُ ہرافتا سوب آن خوراک و دوا تا نیستی ودی مسنے۔ داڑان بیدس گوادر ئٹ دیر نا سپلائی ہم بند کننگانے۔ اوفتا پاننگ ئس کہ گوادر ئٹ بلوچ راجی مُچی آ ظلم و تادی نا برخلاف دا وخت گوادر آن بیدس کوئٹہ، نوشکے، پنجگور و تربت ئٹ ہم تولوک برانز آک برجاء ءُ۔
ایلو پارہ غان بلوچ یکجہتی کمیٹی پنجگور نا تولوک برانزحق دو تحریک نا کماش ملا فرہاد و ایلوفتا سروکی ٹی ڈپٹی کمشنر پنجگور آفس نا مونا بنجاہی کسر آ برجاء ءِ۔ تولوک برانز ئٹ اوار مروک آتا ردئٹ برانز بنجاہی کال اسکان برجاء مرو۔
ایڑے تربت ئٹ ہم تولوک برانز برجاء ءِ۔ درو تربت تولوک برانز ئٹ ”بلوچ راجی مُچی آ تادی و ساڑی آ حالیت“ نا سرحال آ سیمینار اس اڈ تننگا۔ ہراڑے سیاسی، چاگڑدی و ادبی تپہ تون تعلقداری تخوک جتا بندغ آک تران کریر۔ تران کروک آک بندغی حق آتا برجاء لتاڑنگ و بلوچ راج ئتون مروک ناروا سلوک آ روشنائی شاغار۔
ایلو پارہ غان کوئٹہ ئٹ ہم بلوچ یکجہتی کمیٹی نا سروکی ٹی تولوک برانز برجاء ءِ، تولوک برانز ئٹ اوار مروک آک میڈیا تون ہیت کریسہ پاریر کہ پرامن برانز کن حوصلہ مند اُن، اوفک گپ و تران نا وخت آ دزگیر کننگوک بندغ تا دمدستی یلہ کننگ نا خواست کریر و ریاست آ زور شاغار کہ او اوفتا خواست آتے پورو کے و بلوچ آتا برخلاف ظلم ءِ ایسر کے۔ اوفتا پاننگ ئس کہ انصاف فراوانی و بلوچ الس نا حق آتا منّنگ اسکان تولوک برانز برجاء مرو۔