بلوچستان نا اِرا جتاء ضلع غاتیٹ مروکا سم کاری تا تدینی تیٹ اِرا بندغ مرگ ئنا گواچی مسر۔
حوال آتا رد ئٹ بلوچستان نا علاقہ دکی مانکی ڈیم نا خڑک آ دُز آتا سم کاری آن موٹر سائکل ڈرائیور مرگ ئنا گواچی مس۔
پولیس نا رد ئٹ سلہہ بند دُز آک دُزی نا وخت آ موٹر سائیکل ئس ہم پُلسہ نرار۔
سم کاری آن مرگ ئنا گواچی مروکا دنیا خان ولد عظیم خان کھتران نا جون ءِ سول ہسپتال آ سر کرسہ جون ءِ المی کاروائی آن گڈ خاہوت نا حوالہ کننگانے۔
ایلو پارہ غان کوئٹہ نا علاقہ پشتون آباد ئٹ نا درست آ سلہہ بند بندغ آک سم کاری کرسہ اسہ بندغ ئسے کھسفیر۔
پولیس نا رد ئٹ کوئٹہ نا علاقہ پشتون آباد ئٹ شیخ چوک آ نا درست آ سلہہ بند بندغ آک سم کاری کرسہ انور پنی او بندغ ئسے کھسفیر و نرار، تدینی نا احوال رسینگسہ پولیس ہمو ہند آ سر مس جون ءِ ہسپتال آ سر کرے۔
جون ءِ المی کاروائی آن گڈ خاہوت نا حوالہ کننگا مستی کاروائی پولیس کننگے۔