کوسٹ گارڈ رویہ نا برخلاف تولوک برانز اینو چارمیکو دے ہم برجاء مس کیہی کسرک بند
گوادر ئٹ پاکستانی کوسٹ گارڈ نا سلوک و گمانی زیاتی نا برخلاف پک اپ مالکان اتحاد نا پارہ غان تروک وخت ایسر مننگ آن پد برانزی تا برانز اینو چارمیکو دے ہم برجاء ءِ ہراڑے کیہی کسرک دائسکان بند ءُ۔
تدوکا چار دے آن برجاء تولوک برانز نا سوب مکران کوسٹل ہائی وے، سی پیک روٹ آ گاڑی تا مرغن قطار آک لگانو اندن کیہی مسافر آک گٹ مسنو۔
یاتی مرے کہ سیمسری و ہندی پوریا تون تفوک پک اپ مالکان اتحاد نا پارہ غان پاکستانی کوسٹ گارڈ رویہ نا برخلاف چار دے مالو تولوک برانز کننگاسس، ہرا بست و بند تون گپ و تران ئٹ بے سہبی نا سوب اینو چارمیکو دے ہم برجاء ءِ و پک اپ خواجہ غاک کسر تیا تولوک برانز کننگ ءُ۔
برانز کروک آتا پاننگ ءِ کہ بست و بند سوبری ئٹ اوفتا ہیت ءِ بِنپک مُسہ دے آن نن برانز کننگ اُن واہم بست و بند ننا ہیت ءِ بننگ کن تیار اف اندا خاطر بیوس مریسہ غٹ کسر تے بند کرینن۔
برانزی تا پاننگ ئس کہ ہراتم اسکان بست و بند ننا ہیت ءِ منیتنے ننا تولوک برانز برجاء مرو و غٹ ہڑاند آتا ذمہ وار ضلعی بست و بند مرو۔