اسرائیل آ حماس نا بے گمان جلہوک و اوفتیان پد غزہ ٹی بناء مروک جنگ ءِ اینو اسہ سال اس مس۔
اینو جنگ ئنا اسہ سال اس پورو مننگ نا دے اسرائیلی لشکر غزہ نا نیام ئٹ حماس نا جنگجو تے ٹک کننگ کن جنگی طیارہ تیٹ بمباری کرینے۔
غزہ نا بست و بند ءِ توروک سلہہ بند تنظیم نا حماس اسہ سال اس مالو اسرائیل نا جاندمی علاقہ تیا کروک جلہو تیان پد اسرائیلی فورسز و حزب اللہ نا نیام ئٹ ہم جنگ بناء مسوسس۔ دا جنگ ئٹ داسہ ترندی بریسہ ءِ ہراڑان پد خُلیس پاش کننگک کہ دا جنگ تیوہ خطہ ئٹ تالان مننگ کیک۔
اسرائیلی لشکر اسہ بیان اسیٹ پارینے کہ اونا جنگی طیارہ غاک لبنان ئٹ حزب اللہ نا ہند آتے ہم ٹک کرینو۔
اسرائیل نا لشکر جاندمی لبنان تون اوار بنجاہی شار بیروت ئٹ ہم کارروائی کرینے۔
ایلو پارہ غان لبنان نا سلہہ بند تنظیم حزب اللہ اسرائیل نا قطبی شار حیفا ءِ ٹک کرینے۔
اسرائیلی میڈیا نا ردئٹ حزب اللہ بھاز آ راکٹ آک حیفا شار نا جتا علاقہ تیٹ تمانو۔
رپورٹ آتا ردئٹ راکٹ جلہو آتیٹ کم آن کم 10 اسرائیلی شاری تا ٹپی مننگ نا حوال آک اریر۔
حزب اللہ دعویٰ کرینے کہ او جاندمی اسرائیل نا شار حیفا ئٹ اسہ فوجی اڈہ ئسے ٹک کرینے۔
ایلو پارہ غان اسرائیل آ جلہو و جنگ نا اسہ سال اس پورو مننگ آ اسرائیلی سر وزیر بینجمن نیتن یاہو درو لبنان نا سیم آ قطبی اسرائیل ئٹی فوجی کارندہ تیتون اوڑدہی کن دورہ کرے۔
دا وخت آ بینجمن نیتن یاہو نا دفتر آن شینک مروک بیان اسیٹ پاننگا کہ اسہ سال اس مالو اسرائیل ءِ اسہ بھیم بش کروک جھٹکہ اس لگا۔
اونا پاننگ ءِ کہ ہمو دے آن پد تدوکا 12 توہ ئٹ اسرائیل تیوہ غا نخشہ ءِ بدل کرینے۔
او گیشتر پارے کہ اسرائیلی لشکر تینا دژمن ءِ ہرا ٹپ آتے تننگ ءِ اوفتیا جہان گوڑینگانے۔ او اسرائیلی فوجی تے پارے کہ اوفک کَٹوکو نسل ئسے ءُ۔
داکان بیدس امریکہ نا صدر نا سرکاری جاہ و دفتر وائٹ ہاؤس آن شینک مروک بیان ئٹ پاننگانے کہ اسرائیل آ جلہو نا اسہ سال اس پورو مننگ آ مجلس ئٹ اوار مرون و دا وخت آ موم بتی ہم روشن کننگو۔
خیال ئٹ مرے کہ حماس ہفت اکتوبر 2023 آ اسرائیل نا جاندمی علاقہ تیا گمان کپروک دروشم ئٹ زمینی، آسمانی و دیری آ کسر تیٹ جلہو کریسس۔
اسرائیلی کوالخواہ تا ردئٹ دا جلہو تیٹ 1200 بندغ مرگ ئنا گواچی مسوسر اندن حماس کم و ود دو نیم سد بندغ ءِ بندی کریسس۔ اوفتیان نیمہ غان زیات ءِ نومبر 2023 ئٹ اسہ ہفتہ ئسے نا عارضی جنگ بندی نا معاہدہ نا ردئٹ یلہ کننگاسس۔
دائسکان ہم کم و ود 100 بندی حماس نا دزگیر ئٹی ءُ۔ اسرائیلی فورسز آتا خیال ءِ کہ حماس نا دزگیر ئٹ ساڑی بندی تیان اسہ تہائی اس کسکنے۔
ایلو پارہ غان ہفت اکتوبر 2023 آ اسرائیلی فورسز آک غزہ ءِ پلویڑ کریسر و اسرائیل نا حکومت حماس نا ایسری و بندی تا آجوئی اسکان جنگ ئنا لڑو کریسس۔
اسہ سال ئسے آن غزہ ٹی اسرائیل نا حماس نا برخلاف برجاء جنگ ئٹ دریابی پٹی نا محکمہ جانجوڑی نا کوالخواہ تا ردئٹ کم و ود 42 ہزار فلسطینی کسفنگانو اندن ٹپی آتا کچ 97 ہزار آن تدینگانے۔
حماس نا بست و بندی غزہ نا جانجوڑی وزیر نا پارہ غان شینک مروک کچ و حساب ئٹ دا پاننگتنے کہ کہوک آتیٹ اخس سلہہ بند اوار ئسر۔ غزہ نا جانجوڑی وزیر نا پاننگ ءِ کہ کہوک آتیٹ نیمہ آن زیات چنا و زالبول ءُ۔
یاتی مرے کہ جنگ آن مُست غزہ نا آباتی کم و ود 23 لکھ ئس ہرافتیان 80 درسد آن زیات بندغ بے اُرا مسنو و اوفتے ہمپ و لڈ کروئی تمانے۔
خیال ئٹ مرے کہ غزہ نا سلہہ بند تنظیم حماس و لبنان نا سلہہ بند تنظیم حزب اللہ ءِ امریکہ، برطانیہ، یورپی یونین تون اوار اوفتا بھاز آ سیوتی ڈیہک دہشت گرد تنظیم گوندرہ۔