طب 2024 نا نوبیل داد ءِ مائکرو آر این اے دریافت کروک اِرا امریکی سائنس دان آک دوئی کریر۔
وکٹر ایمبروز و گیری روکن ءِ مائکرو جین نا دریافت کننگ آ جہانی داد تننگانے۔ دا دریافت جین آتا حرکت ءِ گچین کروک اصول ءِ چائنگ نا بابت اہم پیش رفت ئسے۔
نوبیل اسمبلی نا پاننگ ءِ کہ دا دریافت اُزبہ جوڑ کننگ و اوفتا کاریم کننگ ءِ پہہ مننگ کن بنماسی اہمیت تخک۔
وکٹر ایمبرو یونیورسٹی و میساچوسٹس میڈیکل اسکول ئٹ نیچر سائنس نا پروفیسر ئسے۔ او تینا پٹ و پول ءِ ہارورڈ یونیورسٹی ٹی سر تسوسس۔
روکن جینیات نا پروفیسر ئسے و او میساچوسٹس جنرل اسپتال و ہارورڈ اسکول ئٹ تینا پٹ و پول ءِ ایسر کریسس۔
خیال ئٹ مرے نوبیل داد دوئی کروک آتے کم و ود 10 لکھ ڈالر ہم تننگک۔ دا زر آک داد ئنا بناء کروک سوئیڈش الفریڈ نوبیل نا مڈی آن تننگرہ۔
طب نا داد ئنا پڑو تون ایلو تلہ تیکن نوبیل داد ئنا پڑو بناء مسنے۔ برجاء ہفتہ ٹی پگہ فزکس، پلمے کیمسٹری و پنچ شمبے آ ادب نا نوبیل داد آتا پڑو مرو۔
امن کن نوبیل داد ئنا پڑو جمعہ غا مرو و معاشیات کن 14 اکتوبر آ داد نا پڑو کننگو۔
داد دوئی کروک آک 10 دسمبر آ الفریڈ نوبیل نا سال دے ئنا وخت آ اڈ تروک مجلس ئٹ داد دوئی کننگ کن بَٹنگور۔