پشتون راجی جرگہ – ٹی بی پی سرگپ
پشتون آک ڈیورنڈ لائن نا ہڑتوم آ پارہ غاتیا دہک آتیان جنگ ئنا پلویڑ ئٹی ءُ و اوفتا ڈغار جہانی طاغت آتا جنگ ئنا جاگہ مسنے، ہرانا نہاد ءِ پشتون راج زنک ایسری و باہوٹی نا دروشم ئٹ سر تریسہ کرینے۔ ثور انقلاب آن پد پدین جنگ نا محاذ پشتون ڈغار جوڑ مس، دئے سال اسکان سویت یونین نا فوج ئنا برخلاف دے کیہی ڈیہہ تا پروکسی تنظیم آک پشتون ڈغار ءِ بھس کریسہ کریر و ہفتاد نا دہک ئٹ بناء مروک جنگ اینو ہم جتا دروشم تیٹ برجاء ءِ۔
بیست و یکمیکو کرن ئنا ارٹمیکو دہک آن پشتون ڈغار ئٹ ورناک جنگ ئنا برخلاف و راجی حق آتیکن توار ارفنگ بناء کریر۔ دہک آتیان مروک تادی تا برخلاف پشتون ورناک ’پشتون تحفظ موومنٹ‘ نا پِن ئٹ ایمنی نا بیرک ءِ ارفسہ پشتون ڈغار ءِ جہانی جنگ آتا ہند جوڑ مننگ آن توننگ کن توار ارفسہ ایمنی تحریک نا بنماس ءِ تخار ولے پاکستان نا ریاست ایمنی نا پیامبر آتا برخلاف ہم طاغت نا زور آ تحریک ءِ لتاڑنگ نا کوشست آتے برجاء تخانے۔
پشتون تحفظ موومنٹ پرامن سیاست ءِ تینائی کریسہ سیاسی جہد بناء کرے و تولوک برانز و جلسہ تا ذریعت ئٹ تینا کلہو ءِ پشتون ڈغار ئٹ تالان کرے ولے ریاست پشتون آتا پرامن تحریک ءِ ہم منّیپک۔ ہشت سال آن دزگیری، زوراکی نا بیگواہی و شہادت آتا لڑ برجاء ئس کہ داسہ پشتون تحفظ موومنٹ ءِ کالعدم گوندسہ اودے پشتون راجی جرگہ غان توننگسہ ءُ تاکہ جنگ ئنا برخلاف تحریک ئٹ پشتون آتے ہمکوپہ مننگ آن توریسہ دا جہد لتاڑنگ مرے۔
ہرا ریاستی پالیسیک بلوچ سیاسی مزاحمت ءِ توننگ کن آزموندہ مننگسہ ئسر، ہمو پالیسیک پشتون راج نا برخلاف آزموندہ مریسہ ءُ۔ دزگیری، زوراکی نا بیگواہی و سیاسی باسک آتے کسفسہ پشتون راجی جرگہ ءِ توننگ نا کوشست آتیان ریاست پاش کننگ ءِ کہ داڑے محکوم راج آتیکن پرامن سیاست نا در آک بند ءُ ولے راج آتے سیاسی جہد آن تادی نا ذریعت ئٹ نہ مالو مُر کننگ مسنے و نئے کہ داسہ مننگ کیک۔