پاکستانی لشکر اسہ ہوٹل ئسے آ چھاپہ خلیسہ چار ورنا دزگیر کننگ آن گڈ بےڈس ءُ ہند ئسے آ درینے۔
کراچی آن حوال تا رد ئٹ پاکستانی لشکر اسہ ہوٹل ئسے آ چھاپہ خلیسہ پنجگور پروم نا ہندی رہائشی چار ورنا ءِ دزگیر کننگ آن گڈ بےڈس ءُ ہند ئسے آ درینے ہرافتا چاہنداری زین بلوچ، ظریف احمد، اکرم بلوچ، انیس بلوچ نا پن ئٹ مسنے۔
بلوچ یکجہتی کمیٹی چار انگا ورنا تا بیگواہی نا حوال ءِ پک کرسا پارینے کہ بیگواہ کننگوک ورناک پنجگور نا علاقہ پروم نا ہندی ءُ و علاج کن کراچی صدر نا ہوٹل ئسے ٹی رہینگ ئٹی ئسر۔
خن خنوک شاہد آتا رد ئٹ کراچی پولیس و سول وردی بینوکو کارندہ ہوٹل آ چھاپہ خلِسہ منیجر تون اوار ورنا تے دزگیر کرسا تینتو دریر پدان ہوٹل منیجر ءِ یلہ کریر۔