چپی ءِ پرغنگ – ٹی بی پی سرگپ
زوراکی نا بیگواہی تا ایسری اکن دئے دے آن تیوہ بلوچستان نا چنکا بھلا جتا شار تیٹ بلوچ یکجہتی کمیٹی نا برانزی لڑ ”چپی ءِ پرغنگ: زوراکی نا بیگواہی تا برخلاف بش مننگ“ نا سرحال ئٹ بندغ آک برانز کننگ ءُ۔ دا توہ ئٹ بھلو کچ اسیٹی بلوچستان و کراچی آن خاص وڑئٹ بلوچ خوانندہ تے فرنٹیئر کور و پولیس نا کاؤنٹر ٹیررازم ڈپارٹمنٹ زوراکی ئٹ بیگواہی نا گواچی کرینے۔
اِرا ہزار بیست و چار ئٹ کل آتیان زیات بندغ آک اندا توہ (اکتوبر) ئٹ زوراکی ئٹ بیگواہ کننگانو، ہرافتا کچ ہشتاد و چار ءِ۔ کراچی نا علاقہ بشیر ولیج آن کراچی یونیورسٹی نا ہشت خوانندہ و ڈیرہ بگٹی و نوشکے نا ضلع تیان سی آن زیات بندغ زوراکی ئٹ بیگواہ کننگانو۔
بلوچستان ئٹ زوراکی نا بیگواہی و ریاستی تادی نا برخلاف کاریم کروک سیاسی باسک آتے جہد آن مُر کرفنگ کن پاکستان حکومت نا ادارہ نیشنل کاؤنٹر ٹیررازم اتھارٹی انسداد دہشتگردی ایکٹ ئنا ردئٹ سد آ بلوچ سیاسی باسک آتا پِن تے فورتھ شیڈول ئٹ اوار کرینے۔
پاکستان نا سکیورٹی ادارہ تا زوراکی نا بیگواہی و ریاستی تادی نا برخلاف کاریم کروک بلوچ یکجہتی کمیٹی نا راہشون ماہ رنگ بلوچ و صبغت اللہ شاہ جی ءِ انسداد دہشتگردی واچ لسٹ فورتھ شیڈول ئٹ اوار کننگ حکومت نا بے سوبری نا درشانی ءِ۔
بلوچستان ئٹ پیپلز پارٹی نا متنازعہ حکومت نا پالیسیک بلوچستان نا خراب حالیت آتا گیشتر خرابی نا سوب جوڑ مننگ ءُ۔ متنازعہ حکومت نا بے سوبر آ گام تیان بلوچستان ئٹ ظلم ئنا برخلاف سیاسی تحریک توننگ مننگ کپک و ”چپی ءِ پرغنگ: زوراکی نا بیگواہی تا برخلاف بش مننگ“ نا سرحال ئٹ ہزار آتا کچ ئٹ بندغ آتا برانز آن پاش مریک کہ بروک وخت ئٹ ظلم ئنا برخلاف تحریک اندا ترندی تون برجاء مرو۔