استو فورسز کیمپ آ جلہو آن گڈ علاقہ ئٹ کرفیو نافذ ، ہن و بر نا کسرک بند ، ارا ورنا زوراکی ئٹ بیگواہ
بلوچستان نا ضلع کیچ نا علاقہ دشت کڈان آن حوال آتا ردئٹ استو فورسز نا کیمپ آ جلہو آن گڈ بھلو کچ ئسیٹ آپریشن بناء کننگانے ۔
حوال تا ردئٹ ، جلہو آن گڈ علاقہ ئٹ دکان و خوانندہی ادارہ غاک بند کننگار و کرفیو نافذ ءِ ۔
علاقہ نا ہن و بر کسرک بند کننگار اندن موبائل نیٹ ورک ہم بند کننگانے ، ہراڑان بندغ آتیٹ خلیس تالان مسونے ۔
ہندی ذرائع نا پاننگ ئس کہ علاقہ ئٹ ہیلی کاپٹر آتا بال کننگ برجاء ءِ و بھلو کچ ئسیٹ لشکر تالان ءِ۔
دشت فورسز آپریشن نا وختا، ارا ورنا ءِ دزگیر کریسہ نا درست ہند آ دننگ آن گڈ حوال آک مونا بسر ہرافتا چاہنداری طلال ولد عمر و عامر بلوچ ولد ابراہیم نا پن ئٹ کننگار ۔
دزگیری تا بابت آن گیشتر حوال دوئی کننگتو ۔
شابیت مرے کہ تدوکا نن سلہہ بند بندغ آک دشت کڈان ئٹ پاکستانی فورسز نا کیمپ آ جلہو کریسر ہراٹی اسہ کارندہ نائیک سیف اللہ مرگ ئنا گواچی و 8 ٹپی مسر ، جلہو آن گڈ فورسز علاقہ ءِ گھیرہ کریسہ سرچ آپریشن نا بناء کرے ۔
پن کروک جلہو نا ذمہ واری دسکان اسہ ہم ٹولی ئس ارفتنے ، آزاتی دوست تنظیم آتے اندننگا جلہو تیٹ اوار سمجھیرہ ۔
علاقہ ئٹ برجاء آپریشن و کرفیو نا سوب شاری تا زند زیمی مسونے و مواصلاتی نظام نا بندی نا سوب گیشتر شابیتی حوال اسکان سر مننگ مشکل ءِ ۔