بلوچستان نا ضلع قلات ئٹ مُسہ ایلم نا زوراکی ئٹ بیگواہی و اوفتا یلہ مفننگ نا برخلاف خاہوت اسہ وار پدا برانز کریسہ کراچی کوئٹہ کسر ءِ بند کرے۔
شابیتی حوال تا ردئٹ 8 و 7 دسمبر نا نیامئی نن پاکستانی لشکر کلی زکریازئی منگچر ئٹ ماسٹر محمد اسماعیل نا اُرا غا چھاپہ خلیسہ اونا مُسہ مار محبوب علی، ارشاد احمد و مرید احمد ءِ زوراکی ئٹ بیگواہ کرے۔
زوراکی ئٹ بیگواہی نا برخلاف خاہوت داڑان مالو نو دسمبر آ کوئٹہ کراچی کسر ءِ منگچر نا ہند آ بند کرے۔ بست و بند ئتون گپ و تران و باوری ترفنگ آن پد برانز ایسر کننگا۔
خاہوت نا ردئٹ اسسٹنٹ کمشنر و ڈپٹی کمشنر قلات 2 دے نا وخت خواہاسر کہ اوفتا بندغ آتے یلہ کننگو 2 دے تدینگ آن پد ہم اوفتے یلہ کننگتو۔
خاہوت نا ردئٹ بیگواہ مرید احمد بلوچ نا دماخی حالیت جوان اف۔ او اسہ توہ ئسے آن زیات وخت اسکان اسپتال ئٹ دارو درمان مننگ آن پد منہ دے مُست اسپتال آن پیشتماسس۔
خاہوت نا پاننگ ءِ کہ اوفتا یلہ مننگ کن بیوس مریسہ برانز ئٹ کوئٹہ کراچی کسر ءِ بند کرینن۔
اوفک پاریر کہ تینا بندغ آتا یلہ مننگ اسکان برانز برجاء تخون۔ بلوچ راج خاص وڑئٹ منگچر نا الس آن خواست ءِ کہ سختی نا دا ساہت ئٹ خاہوت تون اوار مریر۔