کسر اُروکا لمہ – ٹی بی پی سرگپ
بلوچستان ئٹ ہر ہنوکا دے ئتون زوراکی نا بیگواہی تیٹ ودکی مریسہ ءِ، و دانا برخلاف تیوہ بلوچستان ئٹ چرجوئی ئٹ برانز ہم برجاء ءِ۔ ضلع کیچ نا علاقہ ہوشاب ئٹ زمان جان و عبدالحسن نا خاہوت اوفتا آجوئی کن سی پیک کسر آ تولوک برانز کننگ ءِ، اندن راشد حسین نا خاہوت ضلع حب ئٹ برانز کننگ ئس۔
راشد حسین بلوچ ءِ متحدہ عرب امارات آن زوراکی ئٹ بیگواہ کریسہ قانود نا برخلاف پاکستان ءِ تننگا، ہراڑے دائسکان او عدالت ئٹ ہتنگتنے۔ راشد حسین نا پیر انگا لمہ شش سال آن تینا مار ئنا آجوئی نا امیت ئٹ برانزی تحریک آتیٹ اوار مریسہ تینا توار ءِ بڑز کننگ ءِ۔
بلوچستان ئٹ سیاسی باسک و خوانندہ تا زوراکی نا بیگواہیک بیست سال آن برجاء ءُ، ولے دا منہ سال تیٹ پاکستان آن پیشن ہم بلوچ سیاسی باسک آک زوراکی نا گواچی مسنو۔ بلوچستان آن ہزار آ سیاسی باسک آک جنگ زدہ حالیت نا سوب پیشن ڈیہہ تیا ہمپ و لڈ کرینو، ولے او ڈیہک بلوچ جہد ئتون تفوک بندغ آتے پاکستان نا دوٹی تریسہ اوفتا زند آتے بھیم ئٹ شاغنگ ءُ۔
راشد حسین نا لمہ تون اوار سد آ بلوچ لمہ غاک ڈکھ آک پُر ءُ زند اس گدریفنگ ءُ و تینا چنا تا آجوئی کن برانز آن بیدس پین ہچو کسر خنپسہ۔ پاکستان نا عدالت آک و بندغی حق آتا کمیشن زوراکی ئٹ بیگواہ بندغ تا خاہوت آتے انصاف فراوان کننگ ئٹ بے سہب مسنو، و بلوچ لمہ غاک ترند برانز ءِ تینا بندغ آتا آجوئی نا اسٹ انگا کسر گوندرہ۔