شہید آصف نیچاری، ماران نا انجیر – میم بلوچ

الّمی خوانبو

شہید آصف نیچاری ، ماران نا انجیر

نوشت : میم بلوچ

دی بلوچستان پوسٹ

ماران نا مَش ئٹ لگوک آ ڈیوا اسہ دے ئس ڈیھ ئٹ رُژنائی تالان کیک اندن کہ اسپیدہ رنگ آن گُڈ دے تیبہ جہان ءِ روشنائی بشخک، دا ہیت آ دھرتی نا باتیک گمان کننگ کتوسہ، اوفک ڈیہہ ئنا اپُڑس آتا عاجزی، مش تا بھلا سینہ تو سگ ءِ خناسُر، اوفتیا دا خیال ئنا تدنگ ام ویل ئس اسکہ کہ اسہ اندنو ورناس دا ڈیہہ ئنا دژمن تیکن خاخرس مرو ہرا دا اپڑس آتیان زیات عاجز و مش تا سینہ غان بھلو سگ ئس تخاکہ، اوفک دا ورنا نا چُپّی ٹی ڈھکوک آ طوفان اسکا سر متویسُر، ولے وخت تینا رُدیفوکا گواڑخ آتے تینٹ ہتم نا بشخ جوڑ کیک و ڈیہہ ئنا پیشانی آ زیباؤ خال تخک۔ سنگت آصف جان منگچر نا ڈغار آ ردوکو اندنو لال ئس اسک ہرا نا بہا دنیا نا ہچو زرگر ئسے تون الوکہ نہ آسمان تو اونا مَٹ ودی مریک کہ ولدا آصف ئس پیدا کہ۔

شہید سنگت آصف جان نیچاری دا ڈیہہ ئنا آجوئی نا چِراغ آ پُتک ہلوکا ہمو پِرّک اسک ہرا تینا زند ئٹ اسہ بندغ ئسے ام اسہ چنکو ویل و ڈُکھ ئس روادار متوکہ، خبر تما کہ اینو جاگہ ئسے کسس ناجوڑ یا کس ئس فوت کرینے یا کس ئس پین ویل ئسے نا گواچی مسنے داسکان شار ئنا خف ئٹ ہیت تمتویسس کہ او ویل ئنا ایسری کن یا تینا وس ئنا کچ کمک کننگ کن سر مسّکہ، کس ئسے نیستی ہلوسس یا کس ئسے نا فریشانی نا بنوسس تو اوڑا ڈغار تین مسّکہ ایسکان اونا ویل ایسر متوکہ جارات ئٹ تُولتوکہ۔ آصف جان سد آ بندغ آتا کچاری ٹی تُولوک ہر اسہ چُنا و بھلا، پیر و ورنا نا ہیت ئے غور ئٹ بنگکہ ولے تینا طوفان ءِ تہہ ٹی ڈھکاسس اودے کس آ پاش کتوکہ نہ اونا دروشم آ دا احساس مسّکہ کہ او نہ بیرہ چاہک بلکہ دژمن نا مُخ ئے پِرغنگ کن تفر ءِ سوھان کننگ ءِ۔ کس دا گمان کتوکہ اسہ چُک ئسے نا پِرّہ نا ہسون مننگ ءِ روادار مفروکا دا معصوم آ ادا تا خواجہ دژمن نا کاٹم آ گروک آنبار تمو۔ زند تو زند ئے شہادت آن گُڈ ام باور کننگ سخت ئس کہ دا ہمو ورنا ءِ ہرادے ایلوفتا زند ئتو داخس مہر اسک تینے بُن تِس ولے ڈیہہ ئنا مہر داخس زیبا اسک کہ آصف جان ءِ تینا جان ءِ ندر کننگ آ ایس۔

شہید آصف جان نا مخلصی نا گواہی ءِ ہمو بندغ ام ایتک ہرا اودے زمینداری آ خنانے، جو ئنا خُڑکا گوازی کروکا چُنا تیان الیس سوف ئنا پیٹی تہ پُر کروکا کماش آتے اسکا، خلق ئنا ہر اسہ بندغ دا گڑا نا شاہدی ءِ ایتک کہ او تینا کاریم تتون اخس مخلص اسکہ۔ اودے اونا کاریم تے پاننگ نا ضرورت کس ءِ متو انتئے کہ کس ئسے نا پاننگ آن مُست او تینا کاریم تہ زیبائی ئٹ سر تسکہ۔ اونا گونشت کنا خیال پاہک ہمو بندغ آتو مننگ کیک ارافک بھلو کچ ئسے اسکان تینے آن تینٹ پورو۔ ہرافک تاریخ نا چِٹ ئتو اڑینگتنو بلکہ دیہاڑ نا مہار ئے دُوٹی کرینو گام خلّنگ ءُ۔

شہید آصف جان نا دترک مستونگ نا ڈغار آ وہار ولے دا ہمو جھرکوکا استارکو ہرافک آجوئی نا ہر محاذ آ بلبلور، اونا سادگی، مخلصی، سگ، عاجزی و ترند آ جوزہ غاک اودے ڈیہہ ئنا رکھ ئکن ماران آنبار سلیفے او بیرہ تینکن و تینا سنگت آتیکن نہ بلکہ تیوہ غا راج ئکن اسہ سبخ ئس اِلّا۔ او دا کسر نا چیدہ جوڑ مس ہرا تینٹ آجوئی نا مزل آ سر مریک، پنچ دیری تیان آصف جان ہمو وخت پد کشّاکہ تینے ہرا وخت خُواننگ کن اودے لاہور و ملتان آ راہی کننگا ولے بے جارات آ روح او ڈغار آ آسراتی خنتو۔ دا روح تینا ڈغار آن ودی ئس تینا ڈغار نا خمب ئٹ ہنا۔ دژمن نا ڈغار آ او بھیم سرک مسّکہ کس پائے اودے گڑاس کُننگ ءِ۔ او ڈغار نا آب و دانہ اوڑا حرام اسک۔ ننے اندن انگا سروک آتا راہشونی درکارے ہرا دتر ئٹ چراغ لگّفر و تینا دتر ئٹ گواڑخ رُدفِر دنکہ آصف کیہی چراغ آتہ لگّفے کیہی گواڑخ آتے رُدِفے۔


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔

پُوسکنا حوالک

چین نا دورہ و بلوچستان ئٹ سکیورٹی سختیک – ٹی بی پی سرگپ

چین نا دورہ و بلوچستان ئٹ سکیورٹی سختیک – ٹی بی پی سرگپ پاکستان نا صدر آصف علی زرداری پنچ...