اسہ گنوک ئس
نوشت : انتون چیخوف ( روس )
مٹ : سعدیہ بلوچ
دی بلوچستان پوسٹ
منہ دے مالو ای تینا چُناتا گورنس جولیا ویسلوینہ ءِ تینا خوانوک جا آ خواہفیٹ ۔ ” تول جولیا ویسلوینہ ! ” ای پاریٹ ۔
” بر داسا تین پتین حساب کتاب کین ، اگہ نے پیسہ نا بھاز گرج ارے ولے نی ہچو خواست ئس کروفیس ۔۔ ننا نیام ئٹ سی روبلز تُو ئٹی پاننگاسس ۔۔۔۔۔۔ “
” چِل “
” آخہ _ _ سی ای یاد داشت نا وڑ ئٹ نوشت کریسٹ ۔ ای مدام گورنس تے سی روبلز ہی ایتیوہ ۔ نے داڑے اِرا تُو مسونے ۔“
” ارا تُو و پنچ دے ۔۔ “
” جوان اِرا تُو ای دادے خاص وڑ ئٹ نوشت کریسٹ ۔ دانا دا مطلب مس کہ نے شست روبلز ملوئی ءِ ۔
نوہ یک شمبے کشے ۔۔۔۔۔۔۔۔ نے سماء ءِ کہ نی یک شمبے آ کولیا ءِ خوانفتویس _ _ نی بیرہ دانگ ہینگ گام خلیسہ بس ۔ و مُسہ چھٹی ۔۔۔۔۔۔۔۔۔۔ “
جولیا ویسلوینا نا دروشم شکی مننگ آن خیسن مس ۔ او تینا پچ آتا دامُن ءِ دُوٹی ہلک ، ولے اسہ لوز ئس ہم ہیت کتو ۔
” مسہ چھٹی ، اندا خاطر دواانزدہ روبلز کشے _ _ چھار دے کولیا ناجوڑ ئس و خواننگ متو ۔ نی بیرہ وانیہ تون اختہ اسس ۔ مُسہ دے نا دندان ئٹ دڑد مس و کنا زاہیفہ نے پیشیم نا ارغ آن گڈ کاریم کپننگ کن اجازت تس ۔ دوانزدہ و ہفت ءِ منفی کر گڑا بچار چِل و یک روبلز ۔ سہی ؟ “
جولیا ویسلوینا نا راستیکو خن خیسن مریسہ پالن مس ۔ اونا کھاڈی لڑزا ، بے جارات مریسہ جھکا ، بامس پاک کرے ولے اسہ لوز ئس ہم ہیت کتو ۔ ” پوسکنا سال ئنا دود آتا نیام ئٹ نی اسہ پرچ و پیالہ ئس پرغاس ۔ اِرا روبلز کشے ، انگہ پیالہ نا نرخ زیات جوڑ مریک ۔ انتئے کہ او میرا ئس ۔ خیر الیتہ ای ہراتم نسخان تے سگیتنٹ؟ نا بے پرواہی نا سوب آن کولیا رخت آ لگا و تینا جیکٹ ءِ ہرا ۔ دہ روبلز کشہ۔ و نا بے پرواہی نا سوب آن نوکر وانیا نا پازوار تے دُزا ۔ نے ہر گِڑا غا نظر تخوئی ءِ ۔ دانا دا مطلب مس کہ پنچ روبلز گیشتر کم مسر ۔ دہ جنوری آ ای نے دہ روبلز تسٹ ۔۔۔۔۔۔۔۔ ۔ “
” نی کنے تتویس ۔ “ جولیا ویسلوینا بے وسی ئٹ پارے ۔
” ولے کنتون نوشت کروک ءُ “
چلو جوان ءِ “
” بیست و ہفت روبلز چِل روبلز آن کشے پین بچار چانڑدہ “
ہڑتمکا خنک خڑینک آن پُر مسر ۔ چنکا زیبا غا بامس آنتہ خید آک پیشتمار ۔ بے وس آ مسڑ !
” بیرہ اسہ وار ئس کنے منہ پیسہ تننگا “
او لڑزوکا توار ئٹ پارے ۔ ” و او ہم نا زاہیفہ تس کنے ۔ مسہ روبلز ۔۔۔۔۔ بس ، داکان زیات نہ ۔ “
” راستینا؟ ہُر ۔۔۔۔۔ نی ۔۔۔۔۔۔ دا تو ای نوشت ہی کتوٹ ۔ چانڑدہ غان مُسہ روبلز سیڈ کر پین بچار یانزدہ ۔ دا مسر یانزدہ روبلز ۔ ” ای اودے یانزدہ روبلز تسٹ ۔ او ہموفتے ہلک و لڑزوکا دُوتیٹ اوفتے جیب ئٹ شاغا ۔
” منتوار “ او مدان ئٹ پارے ۔
ای پدی مسٹ ۔ و کوٹی ئٹ چرینگ ءِ بناء کریٹ ۔ ای غصہ غان پُر مسٹ ، ای ہریفیٹ ۔
” منتوار ۔۔۔۔ ؟ _ _ _ انتکن “ ؟
پیسہ غاتیکن “ ۔
” ولے نی سرپند مریسہ ای نے ریفنگ اٹ ۔ اللہ نا قسم ای نے لُٹانٹ ۔ گواچن ئٹ ای نا پیسہ غاتے دُزنگ اٹ ۔
گڑا دا امرو منتوار ئس ؟ “ ۔
” ایلو جا تیا ہراڑے ای کاریم کرینٹ اوفک کنے ہچ تتنو “
” اوفک نے ہچ تتوس ؟ ہچو ہبکئی ئس اف “ ۔
ای نیتون مسخرہ کریٹ ۔ اسہ خرینو سبخ ئس تننگ کن ۔ ای نے پورا ہشتاد روبلز تننگٹ ۔ دا مسر دا لفافہ نا تہہ ئٹ مالو آن ساڑی ۔۔۔۔۔۔۔ مگہ کس داخس نزور و لغور مننگ کیک ؟ نی برانز انتئے کپیسہ ۔ چھپ انتئے مسس ۔ انتئے دا جہان ئٹ کس ئس اندنو ہم ارے ۔ ہرا تینا رکھ ءِ کپ ۔
داخس گنوک “
او بیوسی ئٹ بشخندہ کرے ای اونا دروشم نا زیم آتے خواناٹ ۔
” دا ممکن ءِ “
ای اوڑان دا خریننگا مسخرہ کن بشخنداری کریٹ ۔ اودے ہشتاد روبلز تسٹ ۔
او بھاز وار عاجزی ئٹ منتوار ۔۔۔۔۔۔ منتوار پاریسہ کرے و پیشن پیشتما ۔ ای اودے ہِننگ ئٹ ہُراٹ و ٹَک خلکٹ !
” دا جہان ئٹ نزور ءِ اخس شیف خلنگ ارزان ءِ “
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔