بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹی پارے کہ ننا سرمچار آک نال، کوئٹہ و سامی ٹی مُسہ جتا کارروائی تیٹ کوزہ گیر پاکستانی لشکر، ڈیتھ اسکواڈ کارندہ و جاسوس کیمرہ تے ٹک کریر۔
ترجمان پارے کہ بی ایل اے نا سرمچار آک پنچ مارچ آ خضدار نا علاقہ نال شار ئٹ کوزہ گیر پاکستانی لشکر و ڈھکوک ادارہ تا جوڑ کروک بیرہ پن ئنا ڈیتھ اسکواڈ نا سروک صمد سمالانی ءِ اسہ ریموٹ کنٹرول آئی ای ڈی جلہو اسیٹ ٹک کریر، تراک نا دک ئٹ بننگ آن دژمن نا کارندہ بھاز ٹپی مس اندن اونا مُسہ پین کارندہ جاگہ غا مرگ ئنا گواچی مسر و اوفتا گاڑی ہم بھس مس۔
او پارے کہ صمد سمالانی نال، گریشہ، پنجگور و ایب کیب نا علاقہ تیٹ کوزہ گیر لشکر نا پاننگ آ پِن ئنا ڈیتھ اسکواڈ نا سروکی کریسہ لشکر کشی، اُرا تا چادر و چار دیوالی لتاڑنگ و بندغ آتا زوراکی نا بیگواہی تیٹ کوزہ گیر لشکر نا کمک ئٹ پاش تُد مننگ تون اوار پن کروک علاقہ تیٹ بلوچ آتے ٹِک کریسہ خلنگ ئٹ ہم اوار مسنے۔
ترجمان پارے کہ کوزہ گیر لشکر بلوچ کش کاریم تا بدل ئٹ صمد سمالانی ءِ نشہ بہا کننگ، زر ہلنگ و داڑیلی نا آزاتی تسنے۔ صمد سمالانی راغے، حب و کودہ ٹی دژمن لشکر نا سروکی ٹی بندغ آتا ڈغار تے کوزہ کننگ کون آ کاریم تیٹ اوار مسنے، اندن خاہوت آتے توفک نا زور آ بیوس کریسہ مسن تا زور ئٹ برام کرفنگ ئٹ ہم صمد سمالانی و اونا ٹولی اوار مسنے۔
پین پارے کہ راجی غداری نا ڈوہدار مننگ آ صمد سمالانی بلوچ لبریشن آرمی نا نشانہ غا ئس اندن اوڑتون تفوک غٹ بندغ آک ہم سرمچار آتا پاش نشانہ غا مرور۔
او پارے کہ نال تراک ئٹ جلہو نا ٹک ئٹ پاش صمد سمالانی و اونا کارندہ غاک ئسر، بلوچ سرمچار آتا اولیکو ترجیح السی نسخان تیان رکھنگ مریک واہم دژمن لشکر و اونا کارندہ غاک الس ءِ بندغی اسپر نا دروشم ئٹ کاریم ئٹی ہتیرہ، ہرانا سوب آن بھاز خیالداری آن پد ہم السی نسخان تا گنجائشت مریک۔ راجی آجوئی نا جہد ئٹ السی نسخانک ننکن دڑد و تکلیف ءُ، نن بلوچ الس آن خواست کینہ کہ نسخان تیان رکھنگ کن اوفک کوزہ گیر و اونا ہندی کمکار (ڈیتھ اسکواڈ) آتیان مُر مریر۔
ترجمان بیان ئٹ پارے کہ اسہ پین کارروائی اسیٹی بلوچ لبریشن آرمی نا سرمچار آک 4 مارچ ئنا نن کوئٹہ ٹی قمبرانی روڈ آ ٹہفوک کوزہ گیر پاکستانی لشکر نا اسہ پوسٹ ئسے چغلی بمب ئٹ ٹک کریر۔
او پارے کہ بلوچ لبریشن آرمی نا سرمچار آک اسہ پین کارروائی اسیٹی کیچ نا علاقہ سامی، گیشکور ئٹ کوزہ گیر پاکستانی لشکر پارہ غان مُسہ جتا ہند آتیا خلوک جاسوسی کیمرہ و اوفتیتون گنڈوک برقی آلات آتے ٹک کریسہ بھس کریر۔
ترجمان جیئند بلوچ ایسر ئٹ پارے کہ بلوچ لبریشن آرمی دا غٹ جلہو تا ذمہ واری ءِ ارفک۔