14 مارچ، آغا محمود خان احمد زئی نا شہیدی نا دے
شہید آغا محمود خان احمد زئی
تحریر: سلام صابر | مٹ: مزدک بلوچ
اسہ بندغ ئس ہراتم آسرات آ زند آن پشتمسہ تینا حالیت، تینا چاگڑدی ہاٹی و تینا سیاسی کاریم یا تینا معاشی بریبری کن جہد ئس کننگ و اوڑکن کہینگ کن تیار مریک، گڑاس دا جوزہ ءِ تپہ تون گنڈِرہ، و گڑاس دادے قومی طرفداری نا پن ایترہ، و گڑاس دادے ظلم آن پشتموکا بے انصافی نا بھرم پارہ۔ ولے دن افک، ظلم و بےانصافی تون مون تِننگ کن نا ذات ئنا مزور، مظلوم، یا محکوم مننگ المی افک انتئے کہ جہد مدام رُو و راست ظلم و بےانصافی نا آخہ بلکن شعور نا ودشتی ئسے۔ نہ تو ارجنٹیا نا آسودہ غا ڈاکٹر چی گویرا بولیویا ٹی دم تِتوکہ، فرانس نا سارتر نا قلم تینا وطن نا برخلاف الجزائر کہ ارفنگتوکہ، و نہ نوابزادہ برٹرنڈرسل نا توار مظلوم آ تیکن ارفینگاکہ۔
اندون اسہ گمنامو پن ئس شہید آغا محمود احمدزئی نا دروشم یٹ بلوچستان نا مِلک آ سرزمین ئٹ ودی مس، بلوچستان نا شاہی خاہوت نا اسہ شہزادہ ئس مننگ، معاشی لحاظ اٹ باز سوگؤ، چاگڑد ئٹ اسہ بھلو پن ئس تخوکا، تعلیم نا پڑ آ ہم بھلو دماغ ئس داڑان پد ہم او دا آسراتی و آسودہی نا مرغن آ زند ئے ارفتو ہرا اودے دُرونگی ٹی ملِا۔ بلکن او شعور نا بڑز انگا تیبر آ رسنگسہ بے غرضی، مخلصی، سادگی ٹی تینے ویڑوک جوڑ کرسہ و تینا قوم ئنا اشتماعی آسودئی و آجوئی کن جہد بناء کرے و آخر اُو اسہ شہزادہ ئسے آن بار بسترہ ٹی موت ئنا ودار ء کتو بلکہ اسہ لس و باشعور ءُ جہد کار ئسے آن بار دژمن نا سم تہ تینا سینہ ٹی کنسہ مرگ ءِ بغل کرے و مدام دیہاڑ ئٹی زندہ سلیس اندن کہ اُو تینا فکر آ عمل کرسہ و داڑکن تینا جون ءِ ندر کرے اُو دا ثابت کرے اُونا سیالی شعور و کڑمب خیال آتا ٹولی آن ئس۔
ہرافیٹی سارتر، چی، چومسکی و رسل آستان بارنگا بندغ آک گوندنگرہ و داڑتون اوار او تینا دتر اٹ بلوچ قوم کن دیہاڑ نا پنہ غاتیا سبخ ئس نوشتہ کرے کہ شرف ئٹ و مدامی زندہ سلنگ کن قوم ئنا سودا کننگ ئٹ آسودہ مننگ ئٹ اف بلکن تینا مراد آتہ لغت خلسہ قوم ءِ ہرفنگ ئٹ ء۔ بس اندا نفع و نسخان ءِ ہرکس سرپند مس او آغا محمود آنبار مدام زندہ سلیس و ہرکس سرپند متو او اینو اسکان رسوا مس و بنگلہ دیش ئٹ پاہو آ لڑونج ءُ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔