جنگ ئنا بدل مروک اصول آک – ٹی بی پی سرگپ
بلوچستان ئٹ اسہ ہفتہ اسیٹی پاکستانی لشکر آ اِرا ترند حالیت نا جلہو مسر، ہرافتیٹ اودے بھلو کچ اسیٹی نسخان ارفوئی تما۔ اولیکو جلہو ئٹ بلوچ لبریشن آرمی (بی ایل اے) ڈھاڈر نا علاقہ مشکاف ئٹ جعفر ایکسپریس ءِ ٹک کرے، ہراٹی پاکستان نا جتا ادارہ تیتون تفوک دو سد آن زیات سکیورٹی کارندہ تے بندی کننگا۔ پدان، جھڑپ آتا وخت دا کارندہ غاک مرگ ئنا گواچی کننگار۔ ارٹمیکو جلہو ءِ مجید بریگیڈ نوشکے ٹی فوجی قافلہ غا کرے، ہراٹی درزن آتیٹ مرگ آک مسر۔
مشکاف ئٹ پاکستان ریلوے نا جعفر ایکسپریس آ کوزہ کننگ آن پد کیہی دے تیان بی ایل اے و پاکستانی لشکر نا نیام ئٹ ترند جھڑپ آک برجاء ءُ۔ بلوچستان نا آجوئی نا اِرا دہائی آن برجاء تحریک ئٹ دا تدینی اسہ اہم ہند اس پاش مننگ کیک، انتیکہ بی ایل اے اولی وار اسہ مسافر ٹرین ئسے آ کوزہ کریسہ دو سد آن زیات فوجی کارندہ تے بندی کرے و کیہی دے تے اسکان جنگ کرے۔ دا بلوچ جنگی دیہاڑ ئٹ اسہ بھلو جنگ اس پِن تننگ مننگ کیک۔
پاکستانی لشکر نا حوالکاری کڑدہ (آئی ایس پی آر) نا ڈائریکٹر جنرل لیفٹیننٹ جنرل احمد شریف چوہدری جعفر ایکسپریس نا کوزہ مننگ آن پد اسہ بیان اسیٹ پڑو کرے کہ دا جلہو آن پد جنگ ئنا اصول آک بدل مسنو و بی ایل اے ءِ ترند ورندی تننگو۔ واہم، دا پڑو نا اِرا دے آن پد نوشکے ٹی فوجی قافلہ غا مروک بھیم بش کروک جند ندری جلہو بی ایل اے نا پارہ غان دا کلہو مننگ کیک کہ او ہم دا ”بدل مروک اصول“ آتا ردئٹ جنگ اکن تیار ءِ۔
پاکستانی لشکر نا ترجمان و حکومت نا بھاز آ وزیر آتا بلوچستان نا زمینی گواچنی تیان چپ دعویٰ تیان پد ہم، جنگی ندارہ پاش وڑئٹ دا ظاہر کننگ ءِ کہ بلوچ تحریک آزاتی نا ترندی ٹی ودکی مننگ ءِ۔ بلوچ جنگی تنظیم آتا بدل مروک حکمت عملی تیان دا گمان مریک کہ بروک وخت ئٹ پاکستانی لشکر، اہم معاشی تنصیبات و پیشن ملکی مفاد آتے اندا حالیت نا گیشتر بھیم بش کروک جلہو آتیتون مون تروئی تمنگ کیک۔