کنا استاد کنا راہشون ماسٹر سفر خان – شیہک بلوچ

کنا استاد کنا راہشون ماسٹر سفر خان

نوشت: شیہک بلوچ

دی بلوچستان پوسٹ

امر کہ ہُرس استاد و راہشون ہرا جتا ءُ کردار ءُ، استاد بندغ ءِ اسہ جوانو کسر ئس نشان تیک، امر کہ استاد صباء دشتیاری دانا اسہ بھلو مثال ئسے، صباء دشتیاری تینا استادی نا فن ئٹ قوم ءِ غلامی سرپد کریکہ، پروفیسر عبدالرزاق اسہ راج دوست، علم و کتاب دوست ءُ استاد اس ئسک، دا دشمن بلوچ راج ءِ ہر وخت علم و کتاب آن مُر تخانے و ننا زانت کار آ استاد آتے بے گواہ کرینے زندان تیٹی شہید کرینے، راہشون دُن کہ کاروان نا ہمرائی ءِ کیک و تینا کاروان ءِ کسر نشان تیک، امر کہ استاد اسلم بلوچ راج ءِ آجوئی نا کسر نشان تس استاد دا راج اکن ہر ہند آ آجوئی نا چیدہ تخاکہ، امر کہ بابو نواب نوروز خان اسہ راہشون و جنگجو اس ئسکہ بابو آخیر وخت اسکان تینا کاروان تو سلوک ئسکہ۔ گڑا استاد و راہشون دا جتا ءُ کردار ءُ ولے دا کرداراک اسہ بندغ ٹی بھاز کم مریرہ ولے سنگت یاسر ہمو بندغ ءِ ہرا سنگت کہ استاد ہم جوڑ مسکہ راہشون ہم جوڑ مسکہ۔ و استاد نا وڑ ئٹ نے جوانی و خرابی ءِ سرپد کریکہ نے ہر گڑا ءِ پوہ کریکہ دا کم وخت ئٹی سنگت ءِ تینا وخت ءِ تسکہ و اُست ئٹی سنگت کہ مہر بشخاکہ حوصلہ تسکہ ہر ڈکھ ئٹی نے تو تُد مسکہ و تینا سُبک آ بالاد آ ہر وار بشخندہ ایسکہ اوٹی راہشونی نا کُل ہنر آک ئسرہ و سنگت ءِ ہر وخت غلامی نا احساس ئسکہ اونا سوچ دا قوم ءِ غلامی آن آجو کننگ نا ئس ہراکن او ہر جا غا پند کریکہ قوم ءِ سرپد کریکہ کہ اونا سوچ و فکر آجوئی ءِ۔

او ہر کاریم ئٹی تُد ئس او تینا زندہ نا ہر وخت ءِ آجوئی نا جہد اکن تسکہ، سنگت ماسٹر سفر خان جنگ و کتاب نا علم و فن آتیان واخب ئس سنگت کتاب دوست اس ئس، اوڑتون ہر علم ئس، سنگت جنگ نا ہر چال آتیان واخب ئس، او ہر وخت ہٹکل آتو جنگ تسکہ، ماسٹر سفر خان ہرا وخت آ شار نوشکی ٹی دشمن تو ہٹکل تو جنگ تریسہ اونا سینہ ٹی سُمک لگار تو ماسٹر زمین آ تما او اسہ سوچ و فکر اسیٹی بش مس دشمن تو جنگ تریسہ دشمن ءِ ہِس کرے ماسٹر دا سُم کننگ نا حالیت آ تینے سنگت آتون وتاخ آ سر کرے، شہید سنگت ہموڑے ڈیہہ ئنا کُل ارمان تیتون ساہ تس ماسٹر دا راج و نن کن بس ہر جا آجوئی نا چیدہ تخاکہ، شاعر انور بلسم نا منہ قلم بند ءُ،

”عمل منتھٰا تا شعور آسمانے
اونا چپُا نعرہ بلوچی ترانے
وطن نا او وارث وطن کن ہنانے
خنا پاک و عشق ئس متو لاتمائی“

سنگت یاسر تینا کتابی آ چہرہ تو ہر وخت بشخندہ ئس او نا ہیت آک ہر سنگت کہ پنت و نصیت ئسر او کتاب نا مثال ئس۔ یاسر بُزگری آ بالاد تو بولان نا چیدہ ءِ، کمان نا جل تیٹی اونا زباد ءِ، زرغون نا آپڑس آک نے آن پد ویران ءُ، بولان نا جل تیٹ نا رند آک ءُ، وا بر نی سنگت نے نودگوار خوائک بر سنگت ڈیہہ ئنا ہر بوچ نے خوائک سنگت نے آن پد ہر دیوان ویران ءِ بر کہ سنگت نا مہر آک افس ہمو نا کچاری و پنت آک افس بر کہ سنگت دلگیر اُن نا خزملی خن تیکن۔

ماسٹر سفر خان راجی جہد ئٹ اول آن آخر وخت اسکان اسہ جوش و جوزہ اسیتون سلوک ئسک ماسٹر ہر پوسکن بروکا سنگت ءِ پاریکہ ”نی دا جہد ئٹ اوار مسونس نی اسہ بھلو فیصلہ ئس ہرفینس نے تینا ہر وخت ءِ جہد آجوئی تروئی ءِ نی تینا زات، خلق و خاہوت کل ءِ قربان کریسہ دا جہد ئٹ اوار مسونس نی راج ئنا امیت اس، نی بروکا زنک نا چراغ اُس سنگت نی دا جہد ئٹ سوگوی تون سلیس“ شہید ماسٹر بولان و ناگاہو و شور اسکان پند کرے، و ماسٹر پاریکہ ای ہر جنگی کاریم ئٹ اوار مریو سنگت آخر نوشکی شاری کاریم ئٹ اوار مس جوش و جوزہ تون شہید مس ماسٹر دا جہد ئٹ سوگوی ئٹ سلوک مس۔