نوشکے: پنجاب آن تعلقدار چار بندغ نا جونک خننگار، ذمہ واری ءِ بی ایل اے ارفے

بلوچستان نا ضلع نوشکے نا علاقہ گلنگور ئٹ پنجاب آن تعلقداری تخوک چار بندغ نا جونک خننگانو، ہرانا ذمہ واری ءِ بی ایل اے ارفینے۔

حوال تا ردئٹ نوشکے آن چار بندغ نا جونک خننگار، لیویز نا پاننگ ءِ کہ نادرست بندغ آک اوفتے سم کاری کریسہ مرگ ئنا گواچی کرینو۔ جون آتے قانودی کاروائی کن ٹیچنگ ہسپتال نوشکی آ سر کننگانے۔

ہسپتال ئٹ اوفتا چاہنداری پنجاب نا ہندی تا ڈول ئٹ مسونے۔ اوفتان اِرا بندغ نا تعلق پاکپتن آن ءِ ہرافتیٹی معین ولد غلام مصطفیٰ و حزیفہ ولد محمد لطیف اوار ءُ۔ ایلو اِرا بندغ نا چاہنداری عمران علی ولد مقصود احمد و عرفان علی ولد مقصود احمد نا پن تیٹ مسونے، ہرافتا تعلقداری رحیم یار خان آن ءِ۔

لیویز کوالخواہ تا رد ئٹ تدینی نا پٹ و پول ءِ بناء کننگانے، واہم تدینی نا سوب آک دائسکان سماء تمتنو۔

پن کروک بندغ آتے مرگ ئنا گواچی کننگ نا ذمہ واری ءِ بلوچ لبریشن آرمی نا ترجمان جیئند بلوچ ارفسہ پارینے کہ بی ایل اے نا سرمچار آک نوشکے نا علاقہ گلنگور ئٹ کوزہ گیر پاکستانی ڈھکوک ادارہ آتا چار ءِ مرگ ئنا گواچی کرینو۔

جیئند بلوچ نا رد ئٹ پن کروک کارندہ آتے 9 مئی آ بلوچ لبریشن آرمی نا سرمچار آک نوشکے نا علاقہ احمد وال ئٹ کسر ءِ تفنگ نا وخت آ دزگیر کریسر ہرافک سر و سوج نا وخت منار کہ او دروشم بدل کریسہ کوزہ گیر پاکستانی لشکر و ڈھکوک ادارہ آتیکن مخبر نا ڈول ئٹ کاریم کریسہ اُن۔