ننا اٹمیکو بشخ؟ (ایران اسرائیل جیڑہ)
نوشت کار: جعفر قمبرانی
دی بلوچستان پوسٹ
یات سلے کہ ایران اسرائیل نا نیام اٹ جیڑہ مٹزہبی ءُ جیڑہ اس افک بلکن دا جیڑہ رکھ ئنا و زر ئنا، پدریچ نا و انا نا، گلزمین نا و مفاد آتا جیڑہ سے۔
ہندا سوب آن تون ہرافتا مزغ اٹ چنکو مِلی اس ارے اوفک تینا معاشی و سکیورٹی مفاد آتے مون آ تخسا چھپ کننگ ءُ یا دا اڑتومنگا جنگوڑا غا ملک، ایران و اسرائیل آن اسٹ نا پارہ غا تینا مون ءِ اڑسنگ ءُ، دنکہ امریکہ تینا سفا انگا ہیت ءِ کریسا پارے کہ اگہ دا جنگ چِیڑ کرے تو او اسرائیل نا پارہ غان دا جیڑہ نا بشخ مرو۔۔۔ یانی امریکہ ہم ایران نا برخلاف تینا مخ ءِ تفو۔ ایران آ جلہو کرو۔
بلکن کرے ہم ہندن او ایران نا مسہ ایٹمی مڈی تیا بمب تراک خسیسا دادے امن کن اسہ بھلو مستائی اس سرپد مس۔ یانی ایران نا ایٹمی مڈی تیان امریکہ ہم لپڑزہ مریک یا ایران نا نسخان آن امریکہ نا مفاد آک پورؤ مریرہ۔ ننے آ انت زہم مرو دا گڑّتی نا ہیت اسے۔ کنا خواجہ ننے ہم داسا پہہ مننگ نا گرج ءِ۔
دانگ خف تو داسا:
اسہ ہیت دا کہ امریکہ نا است خواہی اس اگہ بلوچستان اٹی مرے تو بلوچ نا گلزمین تون مرو بلوچ نا مفاد تون اخا۔ یانی امریکہ دا جنگ اٹی ننا گلزمین ءِ بکار کننگ خوائس تو پاکستان اودے تِننگ کن بے وس مریک انتئے کہ دا تینا وامداری والا کھاتہ ءِ بند کننگ اسل خواپک، یانی ننا منشا غان بیدس امریکہ ننا گلزمین ءِ نن تون اوار ایران نا برخلاف بکار کننگ کیک۔ ہرانا نسخان آک نن کن کچ آن ودیک مرور۔
ٹک خلنگ نا ہیت دا کہ اسرائیل و ایران نا جیڑہ نا وخت بوتار نا بوٹی آ کماش امریکہ ٹی انتئے دیوان کیک؟ حالانکہ بوتار تو دا جنگ اٹی ڈکوکائی و خن آن پاش اسرائیل نا جلہو آتے ڈوباریسا خراب پارینے۔ عجیب ءُ ہیت اس اف کہ اسرائیل نا برخلاف کاسا و اسرائیل تون ہم کوپہ غا ملک امریکہ تون زان پہ زان کیسا؟
یانی ”خرما ءِ پا بڑو کُن، میڷ تے پا ہشار مریس“
خیر، مُستی خف تو داسا مون ئنا ہِنوکا سال ایران و پاکستان اسہ ایلو نا باڈر تیا تراک خلیرہ، ولے داسا اسرائیل نا جلہو آن گڈ بوتار ایران نا پارہ غا امر ہننگ کیک؟؟؟
ایران نا نزور مننگ بلوچ نا سیاسی و سِلہہ بند جہد اکن بھلو کسر ملو۔ ہندا سوب آن بوتار ایران ءِ ہم نزور مننگ خواپک۔
واہم دیر ہراڑے سلوک ءِ، دانا فیصلہ ہرکس نا تینا مفاد نا زیہاٹے۔ انتئے کہ دا جنگ اٹ اولس ءِ ریفنگ و مذہبی دروشم تننگ زرس سخت مننگ ءِ مذہبی رنگ تننگ مرے ہم بے سہب! امریکہ عیسائی، ایران شیعہ ہرافتے ننا مُلاک کافر پارہ، اسرائیل تو ایہن یہودی۔۔۔! یانی ننا بوتار داڑے ہمو رنگ آتے بکار کننگ اٹ بے سہب مریک۔ داسا بوتار اگہ ایران نا کمکار متو تو ایران بلوچ نا مسئلہ غا اونا رغ آتے پِڷک۔ انتئے کہ ایران تو ہر وخت بلوچستان نا زنک کسفنگ و کوزہ گیری ٹی بوتار تون ہم کوپہ مسونے۔
ایلو پارہ غان اگہ بوتار اسرائیل نا پارہ غان ہیت کتو تو امریکہ غان وٹّی خالی برو۔ یانی ساڑی وخت پاکستان کن بھلو ڈکھیائی ءُ وخت اسے کہ ہراکان بِٹک۔
داسا ننا دا جیڑہ ٹی اٹمیکو بشخ؟؟؟ مذہب آک ننا اسٹ افس، ایران ننا گلزمین نا زیہا کانڈہ و ایران والا تا ہور آک ہم بلوچ نا دتر اٹ خیسن مسنو۔ داسا اگہ اسرائیل و امریکہ بلوچستان نا گلزمین ءِ دا جیڑہ ٹی بکار کننگ کن ننے آ امیت کیر تو ننے سنت کروئی ءِ؟ تینے پدی کشن تانکہ بوٹی آ بوتار سودہ اس خلے کائے؟
یا
نن پیڑزو کینہ کہ ننا گلزمین اسہ وار پدی ٹپی مریسا ننا تینا برخلاف بکار مرے؟؟؟
او خواجہ، ننے مذہبی تعصب آن پشن مروئی ءِ و پہہ مروئی کہ دا اسہ مذہبی ءُ جیڑہ اس اف!!!
سوج دادے کہ نن و نی ایران کن پاڷ کرینن، اسرائیل آ غُرینہ یا امریکہ ءِ کرینگ ایتنہ،
ننا اٹمیکو بشخ۔۔۔؟؟؟
بلوچستان نا دا جیڑہ ٹی کڑد سفا نلہ پاش ءِ کہ دا گلزمین دا جیڑہ غا زہمی مرو۔ نسخان تون اوار فائدہ ہم رسینگو۔ ولے نسخان و فائدہ، کہنگ کسفنگ نا فیصلہ ننا دوٹی ءِ کہ تینا گلزمین نا مفاد آتے پہہ مریسا تینا قبلہ ءِ چاہنگ کین۔ داسا نن بائدے پہہ مرین کہ ننا کسر ہرادے کہ ننے ننا اصلی مزل آ سر کننگ کیک۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔