آپریشن بام – ٹی بی پی سرگپ
نو جولائی نا نن بلوچستان لبریشن فرنٹ ”آپریشن بام“ نا پڑو کرے، ہراڑان پد دمدستی تیوہ بلوچستان ئٹ چرجوئی تون جلہو تا بنا مس۔ جتا ضلع تیٹ فوجی ہدف آتے ٹک کننگا، اہم کسر تے تفسہ سنیپ چیکنگ کننگا، مڈی تیان پُر ٹرک آتا ٹائر آتے ترخفنگا، موبائل ٹاور آتا مشینریک بھس کننگار، اندن لیویز و پولیس نا سلہہ تے دوئی کریسہ سرکاری مڈی تے خاخر تننگا۔ بی ایل ایف نا پارہ غان ”آپریشن بام“ تیوہ بلوچستان ئٹ جلہو تا اولیکو لڑ ءِ، ہراٹی کیہی ضلع تیٹ جتا حالیت نا ہشتاد آن زیات جلہو کننگا۔
”آپریشن بام“ آن مُست، خدو بلوچ لبریشن آرمی ”آپریشن ہیروف“ نا ردئٹ چانڑدہ ضلع ئٹ چرجوئی تون درزن آ جلہو تے کریسس۔ دا جلہو تیٹ فوج ئنا سلہہ غاک ہلنگار، اہم کسر تے تفسہ 48 گھنٹہ تے اسکان کوزہ برجاء تخنگا، موسیٰ خیل ئٹ اسہ جلہو اسیٹی پاکستانی لشکر ءِ بھلو کچ ئسے آ جانی نسخان رسینگا، و مجید بریگیڈ نا جند ندر آک لسبیلہ ئٹ فرنٹیئر کور نا اسہ اہم کیمپ ئسے آ کوزہ کریسہ اِرا دے اسکان ترند جنگ کریر۔
تدوکا منہ سال تیٹ بلوچستان ئٹ اسہ وخت آ چرجوئی تون جلہو تا رجحان پاش وڑئٹ ودیسہ ءِ۔ اسلام آباد ئٹ ٹہفوک پاکستان انسٹیٹیوٹ فار پیس اسٹڈیز نا ردئٹ، 2025 ئٹ بلوچ مزاحمت کار آتا جلہو تیٹ خدو نا کچ آن 70 درسد ودکی مسنے، و دا جلہو تیان بلوچستان نا اہم کسرک کل آتیان زیات زہمی مریسہ ءُ۔
بی ایل ایف و بی ایل اے نا پارہ غان ”آپریشن بام“ و ”آپریشن ہیروف“ کون آ چرجوئی تون جلہوک دا ہیت ئنا پاش شاہدی ءُ کہ بلوچ مزاحمت کار آک نہ بیرہ بلوچستان نا تلہ غا جلہو کننگ نا لائخی تخرہ، بلکن مالو نا کچ آن کیہی زیات سوگو، چرجوئی و بھیم بش کروک حکمت عملی تون کاریم کریسہ ءُ۔
پاکستان نا فوجی ادارہ غاک نہ بیرہ دا چرجوئی جلہو تے توننگ ئٹ بے سہب خننگرہ، بلکہ اہم کسر و ہند آتیا سلہہ بند تنظیم آتا کسر تفنگ نا برخلاف زہم شاغوک کاروائی ئٹ ہم بے سہبی تون مون تریسہ ءُ۔ وخت آ و زہم شاغوک ردعمل نا مفننگ دا ہیت ءِ پاش کیک کہ بلوچستان ئٹ ریاست نا رٹ اسہ وڑ نزور مریسہ ءِ، و بلوچ مزاحمت کار آک متکنا گوریلا حکمت عملی آن مُستی ہنسہ آجوئی نا جنگ ئٹ جدت پسندی نا پارہ غا روان ءُ۔ او داسہ پوسکنو جنگی حکمت عملی دوئی کریسہ بلوچستان نا اہم کسر تے کیہی گھنٹہ تے اسکان بند کننگ نا لائخی تخرہ۔