بلوچستان نا ضلع کیچ نا علاقہ تمپ میر آباد ٹی نا درست سلہہ بند بندغ آک اُرا غا چغلی بمب ئٹ جلہو و سم کاری کریر، واہم تدینی ٹی ہچو جانی نسخان متنے، ہندی کوالخواک یک شمبے نا دے تدینی ءِ پک کریر۔
ذرائع نا ردئٹ جلہو ہفتہ نا نن اُرے آ مس ہراتم موٹرسائیکل آ سوار اِرا بندغ لقمان پنی آ بندغ نا اُرا غا چغلی بمب غسار، ہرا ترند توار ئٹ ترخار۔ جلہو کروک آک ہند آن نرار ۔
تراک آن اُرا نا دیوال و خڑک ئنا دریچہ غاتے نسخان مس ، واہم کس ئسے نا ٹپی مننگ یا کہنگ نا احوال رسینگتنے ۔
ہندی بندغ آتا پاننگ ءِ کہ دا جلہو ہمو ٹولی نا جلہو تا ڈول ءِ، ہرادے داڑے ” ڈیتھ اسکواڈ “ نا پن ئٹ چاننگ مریک، و ہراڑا ہنوکا وخت ٹارگٹ کلنگ ، تراک و سیاسی باسک آتے ٹک کننگ نا دوبہ خلنگانے ۔
دا دوبہ غاک آزات ذرائع آن پک کننگ متوس و نئے کہ کوالخواک جلہو نا ذمہ واری نا بابت ئٹ سرکاری بیان ئس شینگ کرینو۔ بلوچستان ٹی ”ڈیتھ اسکواڈ “ نا پن آن پِنی سلہہ بند ٹولی تا بارو ئٹ بندغی حق آتا باسک آک بھلو وخت ئسے آن خلیس نا درشانی کریسہ بسونو ۔