بلوچستان: حوال آتا اسہ تہار ءُ ٹنڈیل اس – ٹی بی پی سرگپ

بلوچستان: حوال آتا اسہ تہار ءُ ٹنڈیل اس – ٹی بی پی سرگپ

بلوچستان جہان کن حوال آتا اسہ بلیک ہول اس جوڑ مسنے، و دا حالیت ءِ برجاء تخنگ کن پاکستان نا مقتدر کڑدہ غاک چرجوئی ئٹ جتا ءُ اٹکل کاریم ئٹ ہتنگ ءُ۔ ملک ئنا پرنٹ و الیکٹرانک میڈیا آ بلوچستان نا زمینی گواچنی تیا ہیت کننگ اسہ بے پڑو ءُ ڈوہ اس جوڑ مسنے۔ ہرا صحافیک بلوچ ویل آ قلم ءِ ارفرہ او ریاستی تادی نا گواچی مریرہ۔ ہرا سیاسی جہدکار آک راجی ویل ءِ پاش کیرہ او بندی کننگرہ، و جہان نا بلوچستان اسکان سر مننگ ءِ توننگ کن موبائل انٹرنیٹ نا بند کننگ اسہ لس ءُ کاریم اس جوڑ مسنے۔

بلوچستان نا بھاز آ علاقہ تیٹ وختی آن انٹرنیٹ سروس بند ئس، و بیرہ بھلا منہ شار تیٹ موبائل انٹرنیٹ ئس۔ واہم، 6 اگست نا بیگہ غان رکھ ئنا خراب حالیت ءِ سوب جوڑ کریسہ تیوہ بلوچستان ئٹ موبائل انٹرنیٹ آ تیوہ رکھ خلنگا۔

پاکستان نا بندغی حق آتا کمیشن (ایچ آر سی پی) نا 9 آن 12 جولائی 2025 نا فیکٹ فائنڈنگ رپورٹ نا ردئٹ بلوچستان ئٹ اسہ بھیم بش کروک رجحان اس مونا بسنے: زوراکی نا بیگواہی تا لڑ انگہ برجاء ءِ، جمہوری آزاتیک محدود مریسہ ءُ، صوبائی آزاتی گیشتر نزور مسنے، صحافت آ رکھ خلوک ءِ، و قانود آن بڑز مننگ نا رجحان وس آن تیر مسنے۔ دا غٹ کاریمک بلوچستان ئٹ السی بیگانئی و سیاسی بے سوگوی ءِ گیشتر کڑمب کننگ ءُ۔

انفارمیشن ٹیکنالوجی نا دا وخت ئٹ انٹرنیٹ نا بند مننگ نا کل آتیان زیات نسخان خوانندہ، واپاری، ای کامرس، موبائل بینکنگ و فری لانسنگ تون تفوک بندغ آتے مریک۔ البتہ مزاحمتی تحریک آتیا دانا دمدستی زہم آک تمپسہ انتیکہ انٹرنیٹ نا بند کننگ وختی دروشم ئٹ حوال آتا بننگ ءِ توننگ کیک۔ ولے حوال تے اسکان سر مننگ ءِ محدود کریسہ جہان ءِ ساندئی کن بلوچستان نا زمینی گواچنی تیان بے سماء تخنگ ممکن اف۔