زبان و انقلابی تحریک آک
نوشتہ کار: شاہ زیب بلوچ
دی بلوچستان پوسٹ
بندغ نا دیہاڑ نا کل جنگ آک توفک، زغم، و بیر آتے بُڑز کننگ ئٹ مسنو ولے کل آن سخت و کڑمب آ جنگ آک لوز آتیٹ کننگانو۔ زبان بیرہ اسٹ ایلو تون ہیت ئنا وسیلہ اس اف بلکن راج آتا روح پاننگ مریک، باوہ، پیرہ، و لُمہ غاتا تروک آ یات آک، اوفتا ہمے وخت ئنا گدریفوک آ زبیا انگا ساہت آک، اوفتا یادداشت آتا مڈی ءِ زبان، و آجوئی نا کل آن طاغتی آ سلہہ ءِ زبان، ہرا زنک آتے اسٹ ایلو تون سوگوْ کیک۔
فرانزفینن تینا کتاب، “black skin and white mask” ئٹی پائک کہ کوزہ گیر ہراتم غلام آ راج نا زبان ءِ ہیل کیک گڑا او بیرہ لوز مفسہ بلکن دا اونا نفسیات نا واپار مریک، ہرا کہ اونا پجار ءِ تینا وڑئٹ مٹ کریسا کیک۔ فینن پائک کہ، کوزہ گیر آ طاغت آک تینا زبان ءِ بھلن درشان کیرہ گڑا دانا معنہ انت سرپند مننگ مرے؟ فینن پائک کہ، او دا پاننگ نا کوشست ئٹی مریرہ کہ نم کنے آن شیف اُرے، نما زبان، نما دیہاڑ و نما دود و ربیدہ غاک کنے آن شیف چاننگرہ۔ گڑا ہراتم غلام آ راج کوزہ گیر نا زبان ئٹ ہیت کیک گڑا ہمو وخت آ کہ او جہان ءِ شان تننگ مریک کہ ای داڑان کم اُٹ۔ فینن پائک کہ دا ہمو سِل (Mask) ءِ ہرادے غلام آ راج شاغک کہ زور گیر آ راج ئنا مون ٹی اسہ بندغ اس چاننگو۔
گوگی وا تھیونگ تینا کتاب، “decolonizng the mind” دادے اسہ دود و ربیدئی بمب (Cultural Bomb) اس پائک۔ دانا معنہ ہندادے کہ دا ہمو عمل ءِ ہرا ٹی اسہ راج ئسے اوفتا زبان، کسہ، و پِن تیا اوفتا یخین ءِ ایسر کننگک۔ گوگی پائک کہ کوزہ گیر نا برخلاف گواچنی جنگ زبان نا جنگ ءِ۔ انگریزی ءِ یلہ کننگ و تینا زبان ءِ ”گیکوئوں“ ئٹ نوشتہ کننگ، اسہ ذاتی ءُ است خواہی اس اف بلکن اسہ سیاسی ءُ توار ئسے، او دا پائک کہ آجوئی ہمو وخت مرو ہراتم افریقہ نا کسہ غاک اونا جند ئنا زبان ٹی نوشتہ کننگ مرور۔
اسه بلوچی قول ئسے کہ: کنا سنگت کنا ڈیھ، کنا زبان کنا بولی، کنا لمہ نا دا زیبا غا لولی، اسٹ ایلو آن جتا افس۔
زبان و انقلابی شعور:
ہرا اسہ تحریک شعور نا دوئی کننگ آ بنا مریک، بندغ نا شعور ساندہ زبان نا دروشم ئٹ دوئی مریک، ہراٹی بندغ تُغ خنک، ہیت و تران کیک، و ڈٹ بندی جوڑ کیک۔ گوگی پائک کہ ہراتم اسہ راج اس تینا زبان ءِ گیرام کیک گڑا اوڑتون اوار او تینا سار و یات آتے ہم گیرام کیک۔ دا بیرہ توار و چیدہ مفسا بلکن داڑتون اوار شعور، دیہاڑ، و علم ہم گیرام کننگک ہرادے اوفتا باوہ، بیرہ غاک کیہی ہزار سال آتیان جوڑ و رکھاسر۔
فینن ہم دا ہیت ءِ پائک کہ آزاتی ہمو وخت اسکان تیبہ اف ہراتم اسکان زبان آجو متنے، اگہ دا وڑ مف گڑا کوزہ گیر ساندہ خواجہ ”حاکم“ نا سوچ ئنا دروشم ٹی رہینگو۔ گڑا ہندا سوب آن شئر آک، نوشت غاک، ہیت آک، ہمو جاگہ نا بندغ آتا زبان ئٹ مریرہ، گڑا دا بیرہ ایہن ءُ ہیت مفسہ غلامی ٹی خاچوک آ ضمیر آتے کوک ترسا بش کیرہ۔ اوفتا لوز آک، غلام آتا کاٹم تے بیوس کیرہ پام کننگ آ گڑا راج ءِ اسٹ کیرہ۔
بلوچستان ئٹی زبان اسہ نظریہ اس اف بلکن اسہ زندہ ءُ گواچنی ئسے، بلوچی و براہوئی زبان آک سدا سال آتا شاعری، و کسہ نا دروشم ئٹ اریر ولے بے بختی ہندا دے کہ دا زنک آن تعلیم و راجی کاریم آک مُر کروک ءُ۔ دا اسہ تدینی اس اف بلکن دا اسہ ڈٹ بندی ئسے تاکن بلوچ نا راجی و دود و ربیدئی خودمختاری نا روتہ غاک نزور مریر۔ ہندا سوب آن اینو شعوری آ و خوانندہ غا تنظیم آک تینا زبان ءِ مدام زندہ تخنگ کن جہد کننگ ءُ۔ کتاب آتا تالان کننگ، و ادب ءِ نوشتہ کننگ و پٹ و پول کننگ ءُ۔ سید ظہور شاہ ہاشمی بلوچی زبان ءِ اولی ٹی کسر اس تس و مبارک قاضی، مرید بلوچ، ڈاکٹر باری آجو، ابصار آن بار انگا براہوئی و بلوچی ٹی شاعری کروک آک اینو زبان آتے مزاحمت نا توفک جوڑ کرینو۔
بلوچی و براہوئی نا جند ئنا لوز آک اونا مُتکن آ دیہاڑ نا شاہدی ءِ ایترہ۔ دانا ادب بلوچ راج ئنا دود و ربیدئی آ مڈی ءِ، ہرا کہ بلوچ نا ہزار آ سال تا دیہاڑ ئنا دروشم نا رنگ ئسے، ہندا سوب آن اینو براہوئی زبان آ کاریم بھاز المی ءِ۔
زبان ٹی بیرہ لوز و توار افس، دا ٹی جہان ءِ ہُننگ نا وڑ و ڈول و راج ئنا سوچنگ نا وڑ ارے۔ دا راج ئنا اخلاق آتا درشان ءِ ہراکہ مُچ جہان ءِ ہمو راج ئنا دروشم ءِ نشان ایتک۔ تینا لمئی آ زبان ئٹ ہیت کننگ نا معنہ ہندادے کہ نی دا جہان ءِ تینا خن تیٹی ہُننگ اُس۔ گڑا نی کس ءِ ہم الیپہ کہ نے آن کس اس دا حق ءِ پُلے۔
ہندا سوب آن ہر اسہ آجوئی نا تحریک زبان نا کاریم تیان بیدس سرسہب مننگ کپک، او تحریک افریقہ نا مرے یا بلوچستان ٹی برجاء غا تحریک مرے۔ امر کہ گوگی انگریزی زبان ءِ یلہ کریسا تینا زبان ٹی نوشتہ کننگ ءِ بنا کرے۔ ہندا وڑ فینن خنا کہ زبان نا غلامی اسہ ذہنی زمزیر ئسے، امر ءُ کہ انقلاب اس مرے، اگہ او تینا زبان ءِ پدا ہترنگ کپک گڑا او ایلو نا زبان ٹی ہیت کننگ آ بیوس مریک۔
فینن ہمو پنجرو (Cage) ئنا درشانی کیک ہرا نا وسیلہ ئٹ کوزہ گیر نا سوچنگ نا طاغت ءِ ایسر کیک و گوگی ننے سرپنداری ایتک کہ امر دا غلامی نا پنجرو نا زمزیر ءِ پرغن۔ اینو بلوچ ءِ ہر پڑ ئٹی زبان ءِ ہترسہ تینا زبان آتا رکھ ءِ کروئی ءِ۔ انتیکہ دا فیصلہ بیرہ زبان نا اف بلکن ننا راج ئنا آجوئی نا ءِ۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔