امریکی صدر ڈونلڈ ٹرمپ نا بست و بند جتا انگا ڈیہہ تا سفارت خانہ آتیٹ 30 ئنا خڑک سفات کار و ایلو بڑزکو اوغدہ تیا مروک کالخواہ تے دوارہ خواہفینے۔
دا گام ءِ پیشن ملک سفارت کاری ءِ اسہ پوسکنو دروشم اس تننگ نا اسہ اندنو وڑ ڈول اسیٹ اوننگسہ ءِ ہرا صدر ٹرمپ نا “امریکہ فرسٹ” نا پامداری تیتون ہمگرنچ ءِ۔
امریکی احوالکار ادارہ آک ایسوسی ایٹڈ پریس نا رد ئٹ محمکہ خارجہ نا اِرا وسیلہ پجار ءِ پاش کننگ آن بیدس پاریر کہ 29 ڈیہہ تیٹ مشنز آتا سروک آتے تدوک ہفتہ ئٹ پاننگاسس کہ اوفتا وخت جنوری نا ایسر ئٹ ایسر مرو۔
دا کل بندغ آک مسکوہی صدر جوبائیڈن نا وخت ئٹ اوغدہ سمبھالاسر و صدر ٹرمپ نا ارٹمی وار اوغدہ آن گڈ اوغدہ سمبھالنگ آن گڈ بنائی توہ تیٹ مروک آ کاروائی تیان بچاسر ہراٹی سیاسی بنداؤ آ مروک تران آتے ٹک کننگاسس۔
واہم حالیت چار شمبے آ ہمو وخت آ بدل مس ہراتم اوفتے واشنگٹن نا پارہ غان ہندنو نوٹس رسینگ بنا مس ہراٹی اوفتے زو رادہ مننگ نا بابت ئٹ پاننگاسس۔
سفیر، صدر نا منشا ئٹ کاریم کیرہ و لس وڑ آ مُسہ یا چار سال اسکان اوغدہ آتا مریرہ۔
کالخواہ تا پاننگ ءِ کہ بست و بند نا دا گام آن ہرا بندغ آک زہمی مسونو و تینا فارن سروس آن پدماندہ مریسہ افس بلکن اگہ او ہلنگ خواہر گڑا واشنگٹن واپسی آ اوفتے ارٹمی اسائنمنٹس آک تننگ مریرہ۔
محکمہ خارجہ زہمی مروک سفیر آتا کچ آ چمشانک آن تینے توریسہ گام ئنا رکھ ءِ کرینے و اودے “بست و بندی تلہ آ مروک معیاری عمل” اس پارینے۔
او نا پارہ غان دا ہم پاننگانے کہ “سفیر صدر نا ذاتی نمائندہ مریک و صدر دا اختیار ءِ تخک کہ دا ہیت ءِ یخینی جوڑ کیر کہ ایلو ڈیہہ تیٹ ہندنو بندغ ساڑی مریر ہرا “امریکہ فرسٹ” نا ٹِک ءِ مون آ دریسہ کیر۔
ٹرمپ بست و بند نا دا فیصلہ غان کل آن زیات براعظم افریقہ زہمی مسونے و اوڑے سینزدہ سفیر آتے مُر کننگانے ہرافتیٹی برونڈی، کیمرون، کیپ وردے، گبون، آنیوری کوسٹ، مڈغاسکر، ماریشس، نائجز، نائجیریا، روانڈا، سینیگال، صومالیہ و یوگنڈا اوار ءُ۔ ارٹمی نمبر آ ایشیا بریک و او نا شش ڈیہہ ئنا سفیر آتے بدل کننگ مننگسہ ءِ اوفتیٹی فجی، لاؤس، مارشل آئی لینڈ، پاپوا نیوگنی، فلپائن و ویتنام اوار ءُ۔
ہندا وڑ امریکی بست و بند نا گام آن یورپ نا چار ڈیہہ ہم زہمی مسونو ہرافتیٹی آرمینیا، میسیڈونیا، مونٹینیگرو و سلوواکیہ اوار ءُ ہندن مشرق وسطیٰ آن الجیریا و مصر ہم زہمی مسونو۔
جنوبی وسطی ایشیا نا ڈیہہ نیپال، سری لنکا نا سفیر آک ہم دوارہ خواہفنگانو ہندن ہندا لڑ ئٹ گوئٹے مالا و سورینام نا پنک ہم بریرہ۔
سفیر آتے دوراہ خواہفنگ نا بابت ئٹ کل آن مست پولیٹیکو رپورٹ تسوسس ہراڑا باز آ قانود ساز آک خلیس پاش کریسر ہندن امریکی سفارت کار آتا نمائندگی ءِ کروک آ یونین نا پارہ غان ہم رکھ ءِ پاش کننگاسس۔