بلوچ یکجہتی کمیٹی نا بندی راہشون ڈاکٹر ماہ رنگ بلوچ نا ہیڑ نادیہ بلوچ تینا وڈیو بیان ئٹ پارینے کہ ڈاکٹر ماہ رنگ بلوچ و او نا سیاسی سنگت بیبرگ بلوچ، شاہ جی بلوچ، گلزادی بلوچ و بیبو بلوچ ءِ غیر قانودی وڑ آ بندی کننگانے و اوفتا برخلاف عدالتی کارروائی ریاستی زورآوری نا بنداو آ کننگسہ ءِ۔
نادیہ بلوچ نا رد ئٹ 2025 ئٹ اوفتے تھری ایم پی او نا رد ئٹ دزگیر کننگا، ہراڑان گڈ حکومت مُسہ توہ نا نیام ئٹ چِل آن زیات مقدمہ نوشت کرے۔ دا مقدمہ غاک نوشکی، دالبندین، مکران، نصیر آباد، مستونگ، قلات و خضدار تون اوار جتا انگا ضلع آتیٹ نوشت کننگار، ہراڑے کیہی عدالت آک ضمانت ءِ منظور کریر و قانود نا بھلنی ءِ برجاء تخار۔
نادیہ بلوچ پارے کہ کوئٹہ نا انسدادِ دہشت گردی عدالت (اے ٹی سی) نا جج محمد علی مبین کیہی مقدمہ غاتیٹی ضمانت منظور کرے، واہم پدا گڑاس کیس آتیٹ ہمو ضمانت آتے پد بٹنگا۔ دا فیصلہ نا برخلاف ڈاکٹر ماہ رنگ بلوچ و او نا قانودی ٹولی “ٹیم” بلوچستان ہائی کورٹ آ مون کریر، ہراڑے چیف جسٹس کامران ملاح خیل اِرا توہ مالو فیصلہ کریسوسس، ولے دسکان فیصلہ بنفنگتنے۔
نادیہ بلوچ نا رد ئٹ دا حالیت پاش کیک کہ پاکستان نا عدالتی بست و بند ریاستی ادارہ غاتا زور شاغنگ ئٹ ءِ۔
بیان ئٹ پاننگانے کہ ڈاکٹر ماہ رنگ بلوچ و او نا سنگت آک تدوک شش توہ آن ہدہ جیل ئٹ جیل ٹرائل تو مون تریسہ ءُ، ہراڑے کاروائی نئے تو صاف ءِ و نئے کہ انصاف ئٹ ءِ۔
نادیہ بلوچ نا رد ئٹ ہمو جج ہرا ضمانت آتے پد بٹے، داسا جیل ٹرائل ءِ ہم اریسہ ءِ، ہراڑان غیرجانبداری آ سوال بش مریسہ ءِ۔ قانودی ٹیم کیس ءِ ارٹمی جج ئنا حوالہ کننگ نا خواست کرینے، ولے دا خواست رد کننگا۔
نادی بلوچ نا رد ئٹ جج پین دفعات اوار کننگ نا تڑی ہم تسونے۔
نادیہ بلوچ پارے کہ دا حالیت نئے بیرہ انصاف آن نمن ءِ بلکن ہمو پرامن سیاسی کاریم کروک آتیکن ہم بھیم ئسے ہرا تینا راج ئنا توار جوڑ ءُ۔