بلوچ لبریشن آرمی نا ترجمان جیئند بلوچ میڈیا غا شینک کروک بیان اسیٹ پارینے کہ بی ایل اے بلوچ سمندر آتا رکھ اکن تینا باقاعدہ دریابی کڑدہ حمل میری ٹائم ڈیفنس فورس (Hammal Maritime Defence Force – HMDF) نا ٹہفنگ نا فیصلہ کرینے۔
او پارے کہ بی ایل اے نا دا پوسکنا شیف ئنا فورس تینا اولیکو آپریشنل کارروائی نا بنا ءِ کریسہ، درو 12 اپریل 2026 آ سہب ئنا 10 بجہ نا وخت آ، گوادر نا علاقہ جیونی ٹی ”مِل تیاب“ نا ہند آ کوزہ گیر پاکستانی نیوی نا اسہ پیٹرولنگ کشتی ئسے سلہہ بند جلہو ئٹ ٹک کرے۔ ننا سرمچار آتا ترند سم کاری نا سوب آن کشتی ٹی سوار مُسہ کوزہ گیر نیوی کارندہ نائیک افضل، سپاہی جمیل، و سپاہی عمر ہند آ مرگ ئنا گواچی مسر۔ کارروائی آن پد ننا سرمچار آک تینا رکھوک ہند آتیا سر مننگ ئٹ سرسہب مسر۔
ترجمان پارے کہ بلوچ لبریشن آرمی دا پاش کننگ خوائک کہ بلوچ راجی آجوئی نا تحریک داسہ اسہ اندنو ہند ئسے آ بسنے ہراڑے دژمن کن بلوچستان نا ڈغار تون اوار اوار اونا دریابی حد آک ہم المی ءُ مرگ پاش مرور۔ کوزہ گیر پاکستان و اونا سامراجی ہمکوپہ غاک سال آتیان بلوچ دریاب آتا بے قانودی نیلامی ءِ کرینو، ہراڑے ننا مَچی ہلوک آتا معاشی لس خون برجاء ءِ و دریاب آتے فوجی چھاؤنی تیٹ بدل کننگانے۔ حمل میری ٹائم ڈیفنس فورس نا جوڑ مننگ ننا راجی نیوی نا بنا ءِ، ہرا بلوچ مڈی تا دریابی لٹ و پل و دژمن نا دریابی ہن و بر ءِ توننگ و کوزہ مروک دریاب آتا رکھ اکن ہر وخت تیار مرو۔
او پارے کہ بی ایل اے تینا دا خاص نیول یونٹ ءِ عظیم بلوچ مزاحمتی کڑدار حمل جیئند نا پِن آ کرینے۔ حمل جیئند بلوچ دیہاڑ نا ہمو دلیر آ مڷ ءِ ہرا شانزدہمیکو صدی ٹی ہمو وخت ئنا پوسکنا پرتگالی استعمار نا برخلاف دریابی مزاحمت نا بنداو ءِ تخا و تینا عسکری لائخی ئٹ پیشن ملکی کوزہ گیر آتے مات تس۔ حمل جیئند نا کڑد بلوچ راجی یادداشت ئٹ غیرت، جیرت و دریابی رکھ ئنا اسہ بے مٹ و چیدہ ئسے نا دروشم ئٹ نشخ ءِ۔ او پاش کریسس کہ مڈی تیان پُر استعمار نا مونتس ئٹ راجی جوزہ و گوریلا حکمت عملی ساندہ سرسہب مریک۔ بی ایل اے دا پِن ءِ دا ارادہ تون گچین کرینے کہ ننا برجاء غا مزاحمت اندا شرفمند آ دیہاڑی میرات نا چرجوئی ءِ۔ ہرا وڑ حمل جیئند پرتگالی تا توسیع دوست آ ارادہ غاتے مِش تا کرے، اندا وڑ حمل میری ٹائم ڈیفنس فورس برجاء غا وخت ئنا کوزہ گیر آتے بلوچ دریاب آتیان کشو۔
ترجمان ایسر ئٹ پارے کہ بلوچ لبریشن آرمی دژمن ءِ خبڑدار کیک کہ داسہ ننا سلہہ بند دائرہ کار بیرہ مَش و شار تے اسکان اف بلکہ نن دژمن ءِ اونا دریابی تنصیبات و مڈی تیتون اوار کڑمب آ دریاب آتیٹ ہم ٹک کننگ نا تیوہ لائخی دوئی کرین اُن۔ ننا دا جنگ دژمن نا تیوہ پیشتمنگ و آزات و خود مختار بلوچ ریاست نا بحالی اسکان تینا تیوہ غا ترندی تون برجاء مرو۔
بی ایل اے تینا دریابی کڑدہ حمل میری ٹائم ڈیفنس فورس نا جوڑ مننگ نا پڑو کریسہ اونا اولیکو آپریشنل کارروائی نا اِرا منٹ 32 سیکنڈ آ تالان ویڈیو ءِ تنظیم نا آفیشنل چینل ہکل آ شینک کرینے۔
ویڈیو ٹی مول کروک چار سرمچار پوسکنا سلہہ تیٹ سلہہ بند دریاب نا پارہ غا ہنسہ خننگرہ۔
کارروائی آن مُست اوفک بلوچی بولی ئٹ اسہ کلہو اس شینک کریسہ پارہ کہ ہراتم اسکان بلوچ ڈغار آ بلوچ نا اسہ ہم مڷ اس ارے، نن نے (دژمن ءِ) دا دریاب و ڈغار آ مننگ نا موکل تفرون۔ دا ڈغار ننا ءِ، و دا دریاب نا رکھ اکن ننا ورناک تینا ساہ تے ندر کرینو۔
اوفک ودیک پارہ کہ اینو ہم نن تیار اُن، درو ہم تیار ئسون و بروکا وخت ئٹ ہم تیار مرون۔ نن تینا دژمن ءِ پانہ کہ دا ڈغار آن پیشتم۔ نن نے نہ ڈغار آ و نئے کہ دریاب ئٹ رکھوک اِلون، ہر جاگہ غا نے دک لگو۔
پدان اوفک اسہ اسپیڈ بوٹ اسیٹی سوار مریسہ کڑمب آ دریاب ئٹ پاکستانی کوسٹ گارڈ نا اسہ اسپیڈ بوٹ ئسے آ جلہو کیرہ۔ ویڈیو ٹی خننگ مریک کہ بلوچ جنگجوک جارات ئٹ اسپیڈ بوٹ ئٹ ساڑی مُسہ کارندہ ءِ مرگ ئنا گواچی کیرہ۔ جلہو نا وخت آ اسہ کارندہ اس تینا ساہ ءِ رکھنگ کن کڑمب آ دریاب ئٹ درک خلیک، واہم اودے دریاب ئٹی سُم خلیسہ مرگ ئنا گواچی کننگک۔
MONITORING
Action cam, Drone & RPG’s – BLA published video of “The Battle of Zamuran” pic.twitter.com/wXA4unEmn2
— Bàhot باھوٹ (@bahott_baloch) April 10, 2026