حوال تا رد ئٹ تربت بلیدہ نا علاقہ سلو ٹی نادرست بندغاک ارا ٹی پترینگیسہ اسہ بندغ ئسے کسفینو۔
حوال تا رد ئٹ نن نا 3 بجہ آ نادرست سلاء بند بندغ آک سلوب لیدہ ٹی اراٹی پترینگیسہ فتح محمد نا مار سراج ءِ کسفیسہ نرار، سوب آک داسکان سما تمتنو۔
اندن پین حوال ئسے نا رد ئٹ قلات نا خڑک کوئٹہ کراچی بھلا روڈ آ ارا جتا روڈ شکست نا ویل آتیٹ اسہ بندغ اس مرگ نا گواچی اندن ہفت بندغ بھاز ٹپی مسونو۔ ٹپی آک دوا درمان مننگ آن گڈ پین علاج کن کوئٹہ آ راداہ کننگانو۔
گیشتر حوال تا رد ئٹ قلات و منگچر نا نیام ئنا علاقہ مرجان نا خڑک کراچی بھلا روڈ آ ٹوڈی کار گاڑی تا اسٹ ایلو تون ڈک لگینگ نا سوب آن اسہ بندغ اس کراچی گلشن جمشید نا ہندی راج سید سہل اختر نا مار حیدر حسین مرگ نا گواچی مسونو اندن ہفت بندغ ٹپی مسونو۔
اندن ٹپی آتیٹ کراچی نا ہندی محمد یوست نا مار شہزاد، کراشی گلشن حبیب محمد شبیر نا مار حسین، کوئٹہ آن تعلقدار حاجی مولا داد نا مار عبدالستار، کوئٹہ آن تعلقدار مشتاق نا زائیفہ مسمات، مشتاق حامد نا مسڑ محراب، مشتاق احمد کلی شابو کوئٹہ نا ہندی اوار ءُ۔
اندن ایلو ویل نوگدان ہوٹل نا خڑک کراچی آ ہنوک ٹوڈی کار نا بریک فیل مننگ نا سوب آن دس ویلر گاڑی ڈک لگار ہرانا سوب آن ٹوڈی ٹی سوار اسہ چناس ٹپی مس، ٹپی سول ہسپتال قلات آ سر کننگا ہراڑے دوا درمان تننگ آن گڈ پین علاج کن کوئٹہ آ راداہ کننگا۔