لمہ نی پا، دا ورنا تا گواچنی کڑد ننے آن انتئے ڈھکنگانے؟
نوشت: ارسلان بلوچ
دی بلوچستان پوسٹ
دیدگ در آن پیہنگ تون ترند ءُ توار ئسے اٹ لُمّہ لُمّہ پارسہ اس، لُمہ دیدگ نا توار ءِ بنسہ عجب ءُ خلیس اسیٹی ڈب الک و دیدگ نا پارہ غا رمب کرے و دیدگ ءِ خمب کرسا سوج کرے انت مس کنا مار؟ دن ترندتوار خلنگ اُس نا طب تو جوانے؟
دیدگ لمّہ نا زان آ کاٹُم ءِ تخسہ پارے نہ لمّہ ای جوان اُٹ کنا طب جوان ءِ کنے ہچ اف بس لمہ اینے ایتس پاننگ کن بسوٹ لمّہ سوج کرے جی دیدگ انت پاننگ خواسہ؟
لمہ مہالو باوہ پارے نن سریاب آ ماڑی تفپنہ اونگا رہینگپنہ اوڑے ماخول خراب ءِ اوڑے ہڑدے جنگ مریک خوْن مریک فساد مریک اوڑے چُنا چُنا نشہ کیک اوڑے ہر بندغ چڑس چکِک و شراب نوش کیک۔
ولے لمہ ایاِلہ وحید تون داسا مُوسم،پر و برف ئنا چس ءِ النگ کن گاڑی ٹی چکر کُننگ کن ہناٹ تو سریاب ئٹ گدرینگک نا وختا نہ کہ کس ءِ چرس چکنگ آ خناٹ نہ کے کس ءِ شراب نوش و نہ کے کس ءِ خوْن کننگ آ خناٹ۔لُمّہ اوڑے نہ کے چڑس،شراب نا گند ئس بلکن اوڑے کتاب و مہر ئنا گند ئس۔
لمہ دا ترند انگا یخ،تہو و برف ئٹ ای سریاب نا ورنا تے بلا سڑک آ ہزارا آ کتاب آتے تالان کرسا خناٹ لمّہ ارا ورنا تے باوہ خوْنی،چرسی و فسادی پارے لمّہ یخین کیس گواچنی او ورناک دُن الواس لمہ او ورنا تا سینہ آگاہی آن پُر اس،لُمّہ او ورنا تا دوٹی چڑس نہ بلکن قلم ئس لمّہ او ورنا تا خنک راجے رژنہ کروکا چراغ نا وڑ ئسر لمّہ او ورنا تا ملی ٹی احساس اس لُمہ او ورناک نن ناخوانندہ و ناپوانگا ورنا تا فکرئٹی ڈُبینگوک اسور لمّہ دا ورنا تا سوچ آک لس بندغ نا سوچان بھاز بلو اسور، لُمّہ دا ورنا تا دروشمک امو آدینک نا وڑ اسور ہراتے بندغ اُرسا تینا راجی ذمہ واری تے پو مسکہ،لُمہ نی پار دا ورنا تا گواچنی کڑد ننے آن انتاۓ ڈکِنگانے؟
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔