بلوچ آرٹسٹ شاہینہ شاہین نا خون ءِ اسہ سال و چار تو پورو مننگ آن بیدس خوْنیک دزگیر کننگ متور و خوْنی نا دزگیر کپرنگ نا برخلاف تدوکا دے راجی حوالکاری میڈیا نا ویب سائٹ ٹوئٹر آ اسہ آگاہی مہم اس اڈ تننگا ہراٹی چاگڑدی و سیاسی شخصیت غاک و خوانندہ غاک بشخ ہلکر و شاہینہ شاہین ءِ انصاف تننگ نا خواست کریر۔
شاہین شاہینہ نا ارا والا تا پاننگ ءِ کہ شاہینہ شاہین ءِ اونا ارغ محراب گچکی کسفینے و او بااثر شخصیت مننگ نا سوب آن قانود نا دو آن پیشن ءِ۔
ارا والا تا رد ئٹ پن کروک قاتل محراب گچکی دا وختا کراچی ٹی ءِ و پاش چرینگنگ ءِ، ایلو کنڈ آن خوْنی نا خاہوت صلح کننگا زور تننگ ءِ حالانکہ زیمی خاہوت ہچ وڑ ءُ صلح کننگ آن نمن مسونے و وار وار خوْنی نا دزگیری و اودے سزا تننگ نا خواست کرینے، و داسا ہم او اندا خواست آ عملدرآمد کننگ کن خواست کننگو۔
یات مرے کہ شاہینہ شاہین ءِ پنچ ستمبر 2020 آ تربت ٹی اونا ارغ کسفنگ آن گڈ نرا۔ شاہینہ شاہین اسہ بلوچ آرٹسٹ، ٹی وی اینکر و بلوچ نیاڑی تا اولیکو میگزین دزگہار نا ایڈیٹر اس۔
تربت ٹی ہنوکا دے تیا جسٹس فار شاہینہ شاہین کمیٹی نا اسہ مجلس اس اڈ تننگا، مجلس ٹی ہژدہ جنوری آ ضلعی پولیس افسر کیچ نا دفتر نا مونا دھرنا تننگ نا فیصلہ کریسہ پن کروک خوْنی نا دزگیری و حکومت نا بے حسی نا خلاف سوشل میڈیا آ مہم نا فیصلہ ہم کننگا۔