حوال تا رد ئٹ پنجگور ئٹی تدوکا پنچ دے آن بجلی بند ءِ ہرا نا سوب آن غٹ شار ئٹ دیر ئنا سخت کمبوتی تون اوار ٹیلی فون ایکسچینج ئٹی بجلی نا بے مننگ آن پی ٹی سی ایل نا نیٹ سروس ہم بند ءِ۔
شابیتی حوال تا رد ئٹ پنجگور نا علاقہ سیداں کوہ بن نا خُڑک آ منَہ بندغ 132 نا وی ٹرانسمیش لائن نا ٹاور آتا راڈ آتے کشیسہ دریسر ہرا نا سوب آن ٹاور آک ڈغار آ تماسر۔
دا بابت ئٹ کہی وار میڈیا و خاص وڑ ئٹ پنجگور پریس کلب ہم ہیت کرے و میڈیا نا نشان تننگ آن گڈ ٹاور آتا راڈ آتے دوارہ خلنگ مس ولے مخلوق مال غنیمت پوہ مریسہ دوارہ ٹاور آتا بنیاتی راڈ آتے کشانو ہراڑان پنجگور نا پنچ لکھ آباتی بیدس بجلی و دیر آن دا سختی ٹی تمانے۔ پنجگور بست و بند ایسکان دا دُز آتا دزگیری کن کارروائی کپک ایسکان دا چرجوئی اندن برجاء مرو۔
حوال تا رد ئٹ اینو پگہ راڈ آک سولر سسٹم ئٹی مارمرز مریرہ۔ بنجگور نا بست و بند و ایلو زمہ وار ادارہ آک بایدے دُز آتا برخلاف زوت سخت کارروائی کیر۔
ٹاور آتا راڈ آتے دوارہ خلنگ نا کاریم برجاء ءِ و دا وخت اسکان پنچ ٹاور نا راڈ آک خلنگانو و شام اسکان بجلی نا بحال مننگ نا اومیت ارے۔
یاتی مرے کہ کوئٹہ آن واپڈا نا ٹیم پنجگور آ بسنے۔ حوالکار آتا رد ئٹ اینو شان اسکان یا پگہ سہب اسکان بجلی نا بحالی نا سد درسد اومیت ارے۔ دا بابت ئٹ پنجگور نا السی تپہ آک ڈپٹی کمشنر پنجگور عبدالرزاق ساسولی و ایلو کوالخواہ تیان خواست کرینو کہ ٹاور آتا راڈ آتا دزی مننگ نا بابت ئٹ پٹ و پول کریسہ دز آتا برخلاف کارروائی کننگ مرے و ٹاور آتا رکھنگ کن گام ارفنگ مرے۔