مستونگ و کولواہ آن ارا جوْن خننگانو

بلوچستان نا علاقہ مستونگ و ضلع کیچ نا علاقہ کولواہ آن 2 جوْن خننگانو۔

کولواہ آن خننگوک جوْن بد حالیت ءِ ہراڑان اونا چائنداری مننگ مننگ اف اندن مستونگ آن خننگوک جوْن ئنا چائنداری حضور بخش نا مار عبداللہ نا پن ئٹ مسونے۔

رسینگوک حوال تا رد ئٹ کیچ نا علاقہ کولواہ شاپکول آن چار دے مالو مُست ئنا جوْن اس خننگا جوْن ئنا بابت خلیس نا درشانی کننگانے کہ او اسہ بیگواہ بندغ ئسے نا جوْن مننگ کیک انتئے کہ اونا بدن آ بے دادی نا بھلو ٹپ ئنا نشان خننگانے اونا مون تیوہ بد حالیت ءِ ہراڑان چائنداری مننگ کپک۔

ایلو پارہ غان دو شمبے نا دے مستونگ شار آن خڑک آن اسہ ورنا ئسے  نا جوْن خننگانے۔

حوال رسینگتون پولیس جوْن ءِ چائنداری کن ڈسٹرکٹ ہیڈکوارٹر ہسپتال مستونگ آ رادہ کرینے۔

پولیس نا بنماسی سر و سوج نا رد ئٹ  مرگ ئنا گواچی مروک ورنا نا چائنداری زہری آن تعلقدار گزگی گلی نزد امارات ہوٹل خضدار نا ہندی حضور بخش نا مار عبداللہ نا پن ئٹ مسونے و او نشہ نا عادتی اس۔