بلوچستان نا ضلع قلات ئٹ تراک اسیٹ تیل و گیس کمپنی پی پی ایل نا اسہ کارندہ اس مرگ ئنا گواچی و اسٹ بھاز ٹپی مسونے۔
تراک قلات نا علاقہ شیخڑی نا ہند آ تیل و گیس کشوک کمپنی پاکستان پٹرولیم لمیٹڈ نا کاریم کروک ہند آ مس۔ تراک آن اسہ کارندہ اس ہند آ مرگ ئنا گواچی مس و ایلو ءِ بھاز ٹپی حالیت اٹ ہسپتال آ دننگا۔
تراک آن گڈ فورسز نا پین نفری علاقہ غا سر مس۔ و تدینی نا پٹ و پول ءِ بنا کننگا۔ یاتی مرے مون نا تو 18 جولائی آ ہم اندا علاقہ ئٹ گیس و کمپنی نا گیس کشوک دُون ءِ تراک اٹ ٹک کننگا و اوڑے ساڑی گھاٹ آتا توفک آتے ہم نادرست بندغ آک تینتون دریر۔
دا جلہو نا ذمہ واری ءِ بلوچ لبریشن آرمی ارفے۔ تنظیم نا ترجمان جیئند بلوچ پارے کہ مارگنڈ بلاک ون نا دُون ءِ شورہ تخیسہ سرمچار آک بُھس کریر، و اوڑے گھاٹ تروک کارندہ آتے دزگیر کننگا ہرافتے ہندی بندغ مننگ نا سوب آن یلہ کننگا و اوفتا توفک آتے سرمچار آک کوزہ ٹی ہلکر۔
ایلو پارہ غان خضدار ئٹ تدوک آ دے تیٹ کنڈ نا علاقہ ئٹ بم تراک اسیٹ بھاز ٹپی ممتاز غلامانی عرف ممتو ہسپتال ئٹ مرگ ئنا گواچی مس۔ او عامر غلامانی تون ہمو وخت تراک ئٹ ٹک کننگا ہراتم اوفک کنڈ نا علاقہ آن گاڑی ٹی ہننگ ئسر۔
دا جلہو نا ذمہ داری ءِ ہم بلوچ لبریشن آرمی ارفینے۔ ترجمان جیئند بلوچ نا پاننگ ئس کہ پِن کروک ہڑتوم آ بندغ آک شفیق مینگل تون کہی وخت آن کاریم کننگ ئسر، ہرافک ورنا تے بیگواہ و شہید کننگ، اُرا تیا چھاپہ و بھلا کسر آ لُٹ و پُل ئٹ اوار ئسر۔
قلات شیخڑی ٹی اینو مروک تراک نا ذمہ واری ءِ دائسکان کس ارفتنے۔