نوشکی نا رہینگوک ورنا ءِ ارٹمی وار پدا بیگواہ کریر۔
ٹی بی پی باسک نوشکی نا ردئٹ چار تُو مالو آجو کروک ورنا سلال بادینی ولد حاجی عبدالباقی بادینی سکنہ نوشکی ءِ تدوکا دےتیٹ پدا کوئٹہ آن زوراکی ئٹ بیگواہ کریر ۔
حوال تا ردئٹ سلال بادینی ءِ تدوکا دے تیٹ کوئٹہ بروری ریلوے کالونی آن اوتا سیال آتا اُرا آن 12 بجہ نا وخت پاکستانی فورسز و ڈھکوک ادارہ نا کارندہ آن زوراکی ئٹ بیگواہ کریر ہرادان گُڈ اونا باروٹ دائسکان گیشتر حوال رسینگتنے۔
پِن کروک ورنا ءِ اولی وار 5 مارچ 2022 آ اسہ ورنا ئس ہارون بادینی ولد شاہنواز خان بادینی سکنہ نوشکی تون اوار دارالحکومت لاہور آن ہمو وخت بیگواہ کننگا ہرا وخت او دینی و تبلیغ کِن پیشتماسس ۔
خاہوت نا حوال تا پاننگ ءِ کہ دا ہڑتماتے مسجد نا تہہ ئٹ پاکستانی سیکیورٹی فورسز و سادہ پُچ بینوک کارندہ آک زوراکی ئٹ گِھریسہ دریر۔
عینی شاہدین نا ردئٹ تشکیل شدہ تبلیغ جماعت نا امیر اوفتے توننگ کِن کوشست کریر و قران مجید نا واسطہ تریسہ اودے زوراکی ئٹ بیگواہ کننگ آن توننگ نا کوشست کرے ۔
سلال بادینی ءِ اوکان گُڈ جون 2022 آ نوشکی قادر آباد نا ہند آ سُم کاری کریسہ کسفنگا ۔ پِن کروک بندغ نا خون ٹی حکومتی سروکی ٹی سلاء بند جھتہ چلفوک بندغ اوار ءِ ۔
حوال تا پاننگ ءِ کہ دا ورنا ءِ ہم پِن کروک بندغ نا ایماء آ زوراکی ئٹ بیگواہ کننگانے ۔
بلوچستان ٹی زوراکی ئٹ بیگواہی تا لڑ ءِ تُرند پاننگ ءُ۔ ہراڑے تدوکا دے تیٹ منَہ بندغ آجو کننگا ایڑے زوراکی ئٹ بیگواہی تا تدینیک ہم شابیت مسونو اندن تدوکا دے تیٹ ڈیرہ مراد جمالی ٹی سی ٹی ڈی نا دوتیان کسفنگوک چار بندغ نا چاہنداری ہم زوراکی ئٹ بیگواہ بندغ نا مسُنے ۔