بلوچ یکجہتی کمیٹی کیچ نا سروکی ٹی ہفتہ نا دے تربت ئٹ نشتر اسپتال ملتان تدینی و سی ٹی ڈی نا دو آن دزگیر مروک بندغ تا دروغ نا مونتس تیٹ خون و بلوچ ورنا تا زوراکی ئٹ بیگواہی نا بر خلاف برانز کننگا۔
شابیتی حوال تا رد ئٹ برانز عطاء شاد ڈگری کالج آن بناء مس ہرا ٹی اوار مروک آ نرینہ و زالبول آک دو تیٹ بیگواہ بندغ تا عکس و پلے کارڈ آتے ارفیسہ بلوچ نسل کشی نا بر خلاف نعرہ خلکر۔
برانزیک ملتان ئٹ نشتر اسپتال آن خننگوک آ جون تے بیگواہ بندغ تا جون پاریسہ اوفتا ڈی این اے و داڑکن آزات پٹ و پول کروک کمیشن ئس جوڑ کریسہ اصل گواچن تے مونا ہتنگ نا خواست کریر۔
دا وخت آ ایچ آر سی پی اسپیشل ٹاسک فورس تربت نا ریجنل کوارڈی نیٹر پروفیسر غنی پرواز، تربت سول سوسائٹی نا کنوینر گلزار دوست، بیگواہ اسکول استاد رفیق اومان نا مسڑ تون اوار ایلوفک تران کریر۔
تران کروک آک پاریر کہ نشتر اسپتال آن رسینگوک آ جونک بلوچ بیگواہ بندغ تا مننگ کیرہ اندا سوب آن ننا خواست ءِ کہ او جون تا ڈی این اے کننگے تانکہ گواچن آک مونا بریر۔
اوفک پاریر کہ ملتان آن پاش مروک آ جون تے خنیسہ افسوز مریک خیرات نا ساہدار آک ہم دا وڑ تڑنگپسہ ولے ننا چنا تے بے دڑدی ئٹ خون کریسہ جون آک تینا مون خسنگرہ۔
اوفک پاریر کہ حکومتی کوالخواہ تیکن بلوچ مال و مڈی تا لٹ و پل بس الو اندا سوب آن داسا بلوچ آتا جون تا اُزبہ تے کشیسہ بہا کننگک ہرا اسہ بھلو ڈوہ و بندغی حق آتا لٹاڑنگ ئسے۔ بندغی حق آتا تنظیم آک دانا زی آ چُپ ءُ، اقوام متحدہ ڈوہدار ءُ بے چکاری ئسے نا درشانی کننگ ءِ۔
اوفک پاریر کہ چُپی ئٹ ننا مال و مڈی تا لٹ و پل برجا ءِ، ننا بولی و دود و ربیدگ پلنگانو، 15 سال مالو تربت ئٹ اندا گلی نا تہٹی غلام محمد، لالا منیر و شیر جان ءِ بیگواہ کریسہ اوفتا جشوک جون تے تننگا، اگہ ہمو دے آ بلوچ آک سڑک آتیا پیشتمارہ و او زیاتی نا بر خلاف ترند برانز کریرہ گڑا نوائے دا حالیت بتوکہ۔ دا وخت کیچ نا 9 لکھ آباتی ٹی 900 بندغ ہم پیشن پیشتمتور ہرا افسوز نا ہیت ئسے۔
اوفک پاریر کہ بلوچ ورناک شہید کریمہ نا سوچ ءِ دوئی کریسہ بے دادی و ظلم نا بر خلاف پیشتمر و تینا حق اکن توار بڑز کیر۔