بلوچستان نا دریابی شار گوادر ٹی حق ایتبو تحریک نا برانز اسہ وار پین وے تِروک وخت کِن بناء مس۔
پنچ شمبے نا دے گوادر و ایب کیب آن بندغ آتا بھلو کچ ئس جتاء جلوس آتا دروشم ئٹ گوادر شار آ رسینگا۔ اوکان گُڈ بندغ آتا بھلو کچ ئس وائی چوک آ برانز آ توسُر۔
حق ایتبو تحریک نا سروکی ہدایت بلوچ نا رد ئٹ دا برانز ہمو وخت اسکان برجاء مرو ہرا وخت اسکان ننا خواست آتا عملدرآمد مفک۔
یاتی مرے کہ دا برانز ٹی پوسکنا خواست آک اوار ءُ، تُدوکا سال اسہ تُو اسکان برجاء مروک خواست آتیا عملدرآمد کننگتویسس دافتے اوار کریسہ پدا حق دو تحریک برانز بناء کرینے۔
یاتی مرے کہ حق ایتبو تحریک ٹی اوار مروک برانز کروک آک نوزدہ خواست مونا ایسوسُر ہرا خواست آتیٹ بلوچستان نا بلوچ آباتی آ مروک مکران ڈویژن ٹی غیر المّی سیکورٹی چیک پوسٹ آتا ایسر کننگ، گوادر نا دریابی ہند ٹی پیشن ملکی ٹرالرز آتا بننگ و شکار کننگ آ پابندی، ایران آن کُنوک گِڑا آتا ہتنگ نا موکل، شراب خانہ تیکن برجاء کروک لائنسس آتا وے تِننگ، بیگواہ بلوچ سیاسی باسک آتا آجو کننگ ہم ایلو خواست آتیٹ اوار ئس۔
تدوکا سال گوادر نا مُرغنا برانز ٹی مروک غُٹ خواست آتے ارفنگیسہ حکومت بلوچستان برانز کروک بندغ آتون ہیت و گپ کریسس۔
واہم مولانا ہدایت الرحمن بلوچ نا ردئٹ اوفتا ارفنگوک خواست آتیٹ اسِٹ آ ہم عمل کننگتو۔