کم و ود 200 روہنگیا رکھ ہلوک آتون اوار اسہ کشتی نا پِننگ آن گڈ اسہ ہفتہ سے آن ہم زیات وخت بحیرہ انڈمان ٹی وہِنگ ءِ۔ اقواممتحدہ جاندمی ایشیائی ڈیہہ آتیا زور شاغانے کہ او دا کشتی ءِ ٹُبِنگ آن بچفر۔
رکھ ہلوک آتا بابت ئٹ اقوام متحدہ نا ایجنسی جاندم قطبی ایشیائی ڈیہہ آتیا زور شاغانے کہ او دا کم و ود 200 رہنگیا رکھ ہلوک آتےبچفر، ہرافتا سوب آن کشتی تدوکا اسہ ہفتہ سے آن ہم زیات وخت آن سمندر ٹی پِننگ آن گُڈ بےوارث و کُمک کِن ہُروک تار کننگ ءِ۔
اقوام متحدہ نا ایجنسی ( یو این سی ایچ آر ) پنچ شمبے نا دے اسہ بیان ئسے ٹی پارے کہ شابیت حوال رسینگانے کہ یک دسمبر آروہنگیا تا دا کشتی نا انجن فیل مسس و ہمو وخت آن روہنگیا رکھ ہلوک آک تھائی لینڈ نا دریا آ کشتی ٹی گٹ ءُ۔
ایجنسی تینا بیان ئٹ پارے کہ “کشتی ٹی ساڑی بندغ آک کیہی دے آن اِرغ و دیر آن بیدس و دیر نا کمبوتی نا گواچی ءُ۔ “
اونا گیشتر پاننگ ئس کہ اوڑتون اندنو بے پک ءُ حوال ہم ارے کہ دا لڑ تا سوب آن بھاز آ باہوٹیک مرگ نا گواچی مسنو۔
اونا پاننگ ئس کہ ، ” اگہ دا بندغ آتے بچفتوس کشتی آن دھڑفتوس، گڑا بروک آ دے تیٹ گیشتر بندغ آتا مرگ نا گواچی مننگ نا خُلیسارے ۔ “
حوال تِروک ادارہ روئٹرز بندغی حق آتا تنظیم نا بارو ئٹ پارینے کہ دا کشتی نومبر نا اخیر ئٹ بنگلہ دیش آن پیشن مسس و جاندمیتھائی لینڈ نا رنونگ نا دریا نا ماس آ رسینگنگ ئٹ داٹی دیر پُر مننگ بناء مس۔
اونا ردئٹ “( اوفتتون ) کشتی آ اِرغ و دیر کم و ود ایسر مسُنے ” و کشتی ئٹ مروک نرینہ آتا بھلو کچ اس رزان تیٹ دیر ءِ کشِنگ ناکوشست کننگ ئسُر ۔
یو این سی ایچ آر دا تُو نا بناء ٹی حوال تِسس کہ روہنگیا رکھ ہلوک آتا کچ ٹی ” ڈرامائی “زیاتی مسُنے ، ہرا میانمار و بنگلہ دیش آنجاندم قطبی ایشیائی ڈیہہ آتا پارہ آن کشتی تیٹ بیم تروکو سفر کننگ ءُ۔
ایجنسی نا پاننگ ئس کہ ، ” بین الاقوامی بندغی حق آتا قانود نا ردئٹ، سمندر ئٹ گٹ مروک بندغ آک ، ہرا وخت فریشانی ٹی مریر ،گڑا اوفتا رکھ ءِ کروئی ءِ ، و اوفتے جوانو جاگہ سے آ رسیفوئی ءِ۔ ساہ تا رکھ ئکن زوت گام ارفنگ المّی ءِ ۔ ”
میانمار نا لشکر نا خُلیس آن روہنگیا مسلمان آتا نرِیسہ ایلو ڈیہہ تیٹ باہوٹ مننگ نا لڑ داسا ہم برجاء ءِ ۔ دُن آ رکھ ہلوک آتا بھلو کچاس بنگلہ دیش نا سیم آ سنگر تیٹ زند گدریفنگ ءُ۔ دافتیٹ کہیک کاکس بازار نا سنگر تیٹ ناگفتہ حالیت ئٹ رہینگنگ آ بےوس ءُ ۔
میانمار نا راکھین ریاست ٹی فوجی کاروائی سال 2017 ٹی بناء کننگاسس ، ہرادے اقوام متحدہ نسلی پاک آن تعبیر کیک۔ داسکان کمو ود دہ لکھ روہنگیاک تینا اُرا تے الیسہ پند ئٹ و کشتی تیٹ ہمسایہ ملک بنگلہ دیش نا پارہ آ بنانو۔
میانمار حکومت نا ردئٹ فوجی کاروائی روہنگیا آجوئی دوست آتا برخلاف بناء کننگاسس واہم او وخت لشکر آ بےدادی ، جنسی زیادتی وکسفنگ نا دوبہ آک ہم خلنگار۔ ولے میانمار روہنگیا اقلیت نا اشتماعی بدکاری و مرگ نا گواچی کننگ نا وڑ ئنا غُٹ دوبہ آتیان نمنمریسہ بسنے۔