یورپی یونین اوغانستان ئٹ زالبول تے خواننگ آن توروک فیصلہ ءِ بندغی نا بر خلاف ڈوہ ئس پن تس۔
“جی 7″ و یورپی یونین نا وزرائے خارجہ تون اوار ایلو ملک آک ہم طالبان نا کنڈ آن یونیورسٹی تیٹ مسنتا داخلہ آ رکھ خلنگ واوغانستان ئٹ زالبول و مسنتا کنڈ آن تینا بندغی حق و بنداوی آزادی تے کاریم ئٹ ہتنگ نا زی آ پین رکھ خلوک برجاء فیصلہ تا ترندمذمت کرینو۔
یورپی یونین تینا بیان اسیٹ پارے کہ طالبان دن انگا گام تیان تینے اوغان خلقت و جہانی برادری آن پین یکہ کننگ ءِ۔ ای یو طالبان آنفیصلہ ءِ پدا ہلنگ نا خواست ہم کرے۔
سر وزیر تعلیم نا کنڈ آن غٹ سرکاری و نجی یونیورسٹی تیا گدروک چٹھی نا رد ئٹ سئے شمبے آ طالبان اوغانستان ئٹ زالبول تیکنیونیورسٹی نا خواننگ آ نادرست وخت اسکان رکھ خلنگ نا فیصلہ کرینے۔
وزیر ندا محمد ندیم نا دستخط کروک چٹھی ٹی پاننگا کہ ای نم کل ءِ پامدار کیوہ کہ بروک آ نوٹس اسکان زالبول تا خواننگ ءِ توننگ ناپن کروک حکم آ عمل درآمد کبو۔
وزارت نا ترجمان ضیاء اللہ ہاشمی ہرا ٹویٹر آ کلہو پوسٹ ئس کرے اود اے ایف پی ءِ اسہ نوشت کروک بیان اسیٹ دا فیصلہ نا پک ہمکرینے۔
ہزار آ زالبول تے تیوہ ملک نا یونیورسٹی تیٹ داخلہ نا امتحان تروک مُسہ تُوہ ہم متوسس کہ اوفتا بھاز خواننگ آ پدا رکھ خلنگانے۔
تدوکا سال اگست ٹی طالبان نا اوغانستان ئٹ دوارہ اقتدار ئٹی بننگ آن گڈ یونیورسٹی تے پوسکن قانود ٹہیفنگ آ بیوس کننگا۔ او قانودتا رد ئٹ نرینہ و زالبول خوانندہ تا کلاس روم تے یکہ کننگاسس۔ مسنتے خوانفنگ نا موکل بیرہ زالبول و پیر انگا نرینہ پروفیسر تےتننگاسس۔
23 مارچ آ تیوہ ملک ئٹ مسنتا ثانوی خواننگ آ رکھ خلنگا ہرا نا سوب آن یونیورسٹی تیٹ اوفتا کچ بھاز کم مس۔
12 اکتوبر آ امریکہ پڑو کرے کہ او اوغانستان ئٹ زالبول تا حق آتے لتاڑنگ نا سوب آن طالبان آ پوسکنو رکھ خلکنے۔