بلوچستان نا ضلع چاغی نا ہند دالبندین ئٹی ٹریفک شکست ئٹ بینک منیجر تون اوار مُسہ بندغ کسکنو۔
حوال تا ردئٹ پاک ایران آر سی ڈی کسر جوجکی نا ہند آ کار گاڑی نا چپی مننگ آن الحبیب بینک نا منیجر حاجی محمد عثمان تون اوار مُسہ بندغ کسکر۔
لیویز حوالکار تا ردئٹ جوجکی نا ہند آ ترند رفتار آ کار گاڑی وس آن پیشن مریسہ پول ئتون ڈک لگا ہرانا سوب نجی بینک نا منیجر حاجی محمد عثمان ہند کوئٹہ، عبدالغفار ہند کچلاک، محمد ذاکر ہند دالبندین بھاز ٹپی مسر و ٹپ آتا سوب اسپتال ءِ سر مننگ آن مالو ساہ تسر۔ پن کروک ہر مُسہ بندغ نجی بینک نا ملازم ئسر۔
اینو نجی بینک ہم ملازم آتا سوگ ئٹ بند مس۔ تدینی نا گیشتر پٹ و پول ہندی بست و بند کننگ ءِ۔