بلوچستان نا جتا علاقہ آتیٹ سم کاری نا تدینی تیٹ مُسہ بندغ بیران و اسٹ ٹپی مس۔
بلوچستان نا صنعتی شار حب چوکی ٹی ساکران تھانہ نا خڑک استو ننکان داڑیلی نا وختا مزاحمت آ داڑیل آک سم کاری کریسہ حبچوکی نا ہندی ورنا شعیب رند پنی ءُ بندغ ئسے ٹپی کریر۔
ٹپی مروک ورنا ءِ خڑک ئنا اسپتال آ دننگا ہراڑے او ساہ تس۔
تدینی نا برخلاف ورنا نا خاؤت برانز کریسہ بھوانی نا خڑک کوئٹہ کراچی کسر ءِ اُلاخ آتا ہِن و بر کن بند کرے۔
برانز کروکا تا پاننگ ئس کہ حب شار داڑیل آتا دو ٹی ءِ، ہڑدے شاری تے کسفنگک ولے دا غٹ تدینی تیان بیدس ہندی پولیس ہچ کننگاف۔ داسکان اسہ ہم ڈوہدار ئسے دزگیر کننگتنے و نئے حب پولیس دا ویل آ سوبر خننگک۔
اندن بلوچستان نا علاقہ پشین ٹی ڈغار ئسے نا جیڑہ غا سم کاری ٹی اسہ بندغ اس بیران و ایلو ایلم ٹپی مس۔
سم کاری ٹی جاگہ غا بیران مروکا بندغ نا چاہنداری صدیق اللہ نا پن آ مسنگ و اونا ایلم اسرار احمد ٹپی ءِ ہرادے اسپتال آ رادہکننگانے۔
حوال تا رد ئٹ سم کاری نا تدینی بوستان نا ہند آ ڈغار ئسے نا جیڑہ نا سوب آن مسنے۔
ایلو کنڈ آن مشکے نا علاقہ گجر بازار ٹی سلہہ بند بندغ آتا سن کاری ٹی اسہ بندغ اس بیران مس۔
تدینی مشکے نا علاقہ نا گجر بازار ٹی دو شمبے نا سوب مس و کہوکا بندغ نا چاہنداری ماسٹر منظور احمد نا پن آ مسنے ہرا مشکے ناہندی سے۔
سم کاری آن گڈ جلہو کروکا نرار و تدینی نا سوب داسکان سما تمتنے۔